Aqtaý mańynda Bakýden Groznyıǵa ushyp bara jatqan "Azerbaijan Airlines" kompanııasyna tıesili Embraer ushaǵy apatqa ushyrap, 38 adam qaza tapty. Bul oqıǵaǵa qatysty Reseıdiń áýe qorǵanys júıesiniń yqtımal róli týraly boljamdar aıtylýda, dep habarlaıdy "Adyrna" ulttyq portaly.
Reseılik telegram arnalarynda taraǵan málimetterge sáıkes, ushaqtaǵy shuryq-tesik tesikter áýe shabýylyna qarsy qorǵanys júıesiniń jumysynan paıda bolýy múmkin. Atalǵan júıe Sheshenstan men Vladıkavkazǵa ushqyshsyz ushaqtarmen jasalǵan shabýyldan keıin iske qosylǵan. Áskerı sarapshy Ian Matveevtiń aıtýynsha, ushaq apatqa ushyraǵan kezde 9 km bıiktikte ushqan, al mundaı qashyqtyqta “Panır-S1” júıesi áreket ete alady.
Apattan aman qalǵan jolaýshy Rahımov RT arnasyna bergen suhbatynda, ushqyshtardyń Groznyıǵa úsh ret qondyrmaq bolǵanyn, úshinshi talpynys kezinde ushaq syrtynan jarylystyń daýsy estilgenin aıtty.
Qazir apattyń sebepteri "jol qozǵalysy nemese áýe kóligin paıdalaný qaýipsizdigi erejelerin buzý" babymen tekserilýde. Ushaqtyń qara jáshigi tabylyp, tergeýge qosymsha aıǵaq retinde alyndy.
Kólik mınıstri Marat Qarabaevtyń málimdeýinshe, ushaqpen baılanys saǵat 11:28-de úzilgen. Al saǵat 11:30-da ushaq apatqa ushyraǵan.
Apatqa qatysty Aqtaýda ótken brıfıngte komıssııa jetekshisi Qanat Bozymbaev naqty qorytyndynyń tek mamandar zertteýinen keıin jarııalanatynyn aıtty.
"Qazir bul oqıǵanyń sebebin anyqtaý qıyn. Mamandar tergeý júrgizip jatyr, sondyqtan boljamdar aıtýǵa erte. Barlyǵy anyqtalǵannan keıin habarlaımyz," – dedi vıe-premer.
Túpqaraǵan aýdanynda tótenshe jaǵdaı jarııalandy. Apatqa qatysty tergeý jalǵasyp jatyr.
