قازاقستان ۇلتتىق بانكى اقش دوللارىنىڭ ەسكى ۇلگىدەگى بانكنوتتارى ايىرباستاۋدا تۋىنداعان ماسەلەلەرگە جاۋاپ بەردى, دەپ حابارلايدى "ادىرنا" ۇلتتىق پورتالى.
1996-2013 جىلدارى شىعارىلعان دوللار بانكنوتتارىن ەكىنشى دەڭگەيلى بانكتەر مەن بانكتىك ەمەس ايىرباستاۋ پۋنكتەرىنىڭ قابىلداماۋىنا قاتىستى ازاماتتار شاعىمدانۋدا. ۇلتتىق بانك بۇل بانكنوتتاردىڭ زاڭدى تولەم قۇرالى ەكەنىن ايتتى. سونداي-اق، ولاردىڭ تۇپنۇسقالىعى راستالسا، بۇلىنبەگەن بولسا، قازاقستان اۋماعىنداعى ايىرباستاۋ پۋنكتەرىندە ەش كوميسسياسىز قابىلدانۋى ءتيىس ەكەنىن ەسكەرتتى.
«بانكنوتتار زاقىمدالماعان جانە اينالىمعا جارامدى دەپ تانىلسا، قازاقستان رەسپۋبليكاسىنىڭ زاڭناماسى شەتەل ۆاليۋتاسىنىڭ بانكنوتتارىن ايىرباستاۋدا كوميسسيا الۋدى كوزدەمەيدى. تەك تولەمگە جارامسىز نەمەسە اينالىمعا جارامسىز بانكنوتتاردى قابىلداعان جاعدايدا عانا كوميسسيا الىنۋى مۇمكىن»، – دەلىنگەن مالىمدەمەدە.
ازاماتتار ۇلتتىق بانكتىڭ جەرگىلىكتى فيليالدارىنا بىرنەشە فاكت بويىنشا شاعىمدانا الادى. ناقتىراق، ايىرباستاۋ پۋنكتى كوميسسيا السا نەمەسە بانكنوتتاردىڭ شىققان جىلىنا بايلانىستى ايىرماشىلىق ەنگىزسە، سونداي-اق ۆاليۋتانى نەگىزسىز ايىرباستاۋدان باس تارتسا ۇلتتىق بانككە شاعىملانا الادى.
«شاعىمدا ايىرباستاۋ پۋنكتىنىڭ ورنالاسقان جەرى مەن ماسەلە بويىنشا تولىق اقپاراتتى، سونداي-اق بار قۇجاتتاردى قوسا تىركەۋ ۇسىنىلادى. ۇلتتىق بانك بۇل دەرەكتەردى زاڭ اياسىندا ءتيىستى شارالار قابىلداۋ ءۇشىن قاراستىرادى»، — دەلىنگەن حابارلامادا.
