قر پرەمەر-ءمينيسترى ولجاس بەكتەنوۆ قوستاناي وبلىسىنا جۇمىس ساپارى بارىسىندا وڭىردەگى زاۋىتتار مەن كاسىپورىنداردى ارالاپ، ءوندىرىس باسشىلىعى جانە ۇجىمدارىمەن كەزدەسۋلەر وتكىزدى، دەپ حابارلايدى “ادىرنا” ۇلتتىق پورتالى.
جيىن بارىسىندا بىرىڭعاي ۋاقىت بەلدەۋىنە كوشۋ ماسەلەسى دە كوتەرىلدى. قوستاناي وبلىسى تۇرعىندارىنىڭ ايتۋىنشا، 6-شى ۋاقىت بەلدەۋى تابيعي ۋاقىتپەن سايكەس كەلمەيتىندىكتەن، بۇل ماسەلە بۇعان دەيىن دە بىرنەشە رەت كوتەرىلگەن.
پرەمەر-مينيستر ولجاس بەكتەنوۆ تابيعي ۋاقىتتىڭ ازاماتتاردىڭ دەنساۋلىعى مەن ءومىر ساپاسىنا وڭ اسەرى عىلىمي دالەلدەنگەنىن ايتتى. ول 2017 جىلى نوبەل سىيلىعىنىڭ لاۋرەاتتارى ادامنىڭ تسيركاديالىق ىرعاعىن زەرتتەۋ ارقىلى تابيعي ۋاقىتتىڭ ماڭىزدىلىعىن دالەلدەگەنىن ەسكە سالدى.
"قازاقستان ءۇشىن تابيعي ۋاقىت بەلدەۋى — UTC+5. بۇرىن ءبىز تابيعي ەمەس UTC+6 بەلدەۋىندە بولدىق. بۇل شەشىم كەيبىر ادامدارعا باستاپقىدا قولايسىزدىق تۋدىرۋى مۇمكىن ەكەنىن تۇسىنەمىن، بىراق اعزا بىرتىندەپ بەيىمدەلەدى. ەگەر وڭىرلەردە قيىندىقتار تۋىنداسا، ينفراقۇرىلىمدى جاقسارتۋ، جارىقتاندىرۋدى ارتتىرۋ جانە ىڭعايلى جۇمىس كەستەلەرىن ەنگىزۋ ارقىلى ماسەلەنى شەشەتىن بولامىز،" — دەدى بەكتەنوۆ.
سونىمەن قاتار، زاۋىت ۇجىمدارىمەن كەزدەسۋدە مەملەكەت باسشىسىنىڭ باستاماسىمەن جاريالانعان "جۇمىسشى ماماندىقتارى جىلى" اياسىندا ەڭبەك جاعدايلارىن جاقسارتۋ جانە جۇمىسشىلاردى قولداۋ شارالارى تالقىلاندى.
