2024 جىلعى 18 جەلتوقساندa «قازاقمىس كورپوراتسياسى» جشس باسقارما توراعاسى كەنىشتەردىڭ بريگاديرلەرىمەن كەزدەستى، دەپ حابارلايدى “ادىرنا” ۇلتتىق پورتالى.
توراعا نۇراحمەت نۋريەۆ جەزقازعان وندىرىستىك الاڭىنداعى كەنىشتەردىڭ بريگاديرلەرىمەن كەزدەستى. جيىنعا جەزقازعان قالاسىنىڭ اكىمى قايرات شايجانوۆ پەن ساتباەۆ قالاسىنىڭ اكىمى مۇرات بورىباەۆ تا قاتىسقان.
كەزدەسۋ بارىسىندا جۇمىسكەرلەر تاراپىنان كوتەرىلگەن تالاپتار جان-جاقتى تالقىلاندى. جيىن ناتيجەسىندە، جۇمىسكەرلەردىڭ سۇرانىسى بويىنشا «13-ءشى جالاقىعا» 30% ۇستەمەاقى قوسۋ تۋرالى شەشىم قابىلداندى.
سونىمەن قاتار، 2025 جىلدىڭ 1 قاڭتارىنان باستاپ جالاقىنى كوتەرۋ بويىنشا ەكى نۇسقا ۇسىنىلعان.
ياعني، جالاقى مولشەرىن قوسىمشا 8,5%-عا ۇلعايتۋ، وندىرىستىك جوسپاردى ورىنداعانى ءۇشىن 50 اەك كولەمىندە توقساندىق سىياقى بەرۋ ۇسىنىلعان. بۇل توقسان سايىن 196 مىڭ تەڭگەنى قۇرايدى.
ال ەكىنشى ۇسىنىس - جالاقىى 15,6%-عا يندەكستەۋ.
نۇراحمەت نۋريەۆ جالاقىنىڭ كۇرت جانە نەگىزسىز ءوسۋى كەيبىر كەنىشتەردىڭ باسەكەگە قابىلەتتىلىگىن جوعالتىپ، جۇمىس ورىندارىنىڭ جابىلۋىنا اكەلۋى مۇمكىن ەكەنىن اتاپ ءوتتى. وسىنى ەسكەرە وتىرىپ، جۇمىسشىلارعا ۇسىنىلعان شەشىمدەر تۇسىندىرىلۋدە.
2024 جىلعى 19 جەلتوقسان، ساعات 09:00-دەگى جاعداي بويىنشا كەلىسسوزدەر جالعاسادى.
ايتا كەتەيىك، "قازاقمىس" كورپوراتسياسى جەزقازعانتۇستىمەتال وندىرىستىك بىرلەستىگىنە كىرەتىن وڭتۇستىك-جەزقازعان جانە جىلاندى كەن ورىندارى جۇمىسشىلارىنىڭ تالاپتارىنا جاۋاپ بەرگەنى تۋرالى جازعان ەدىك.
