"قازاقمىس" كورپوراتسياسى جەزقازعانتۇستىمەتال وندىرىستىك بىرلەستىگىنە كىرەتىن وڭتۇستىك-جەزقازعان جانە جىلاندى كەن ورىندارى جۇمىسشىلارىنىڭ تالاپتارىنا جاۋاپ بەردى. باسشىلىق جۇمىسشىلاردىڭ جالاقىسىن وسىرمەيتىنىن مالىمدەگەن، دەپ حابارلايدى "ادىرنا" ۇلتتىق پورتالى.
17 جەلتوقسان كۇنى ۇلىتاۋ وبلىسىنداعى "وڭتۇستىك قازاقستان" كەنىشىنىڭ №65 شاحتاسىنىڭ قىزمەتكەرلەرى ەرەۋىلگە شىققان بولاتىن. ەرەۋىلشىلەر الدىمەن جالاقىنى 30%، ءبىراز ۋاقىتتان كەيىن 100% كوتەرۋدى سۇرادى. "قازاقمىس" ءباسپاسوز قىزمەتى كورپوراتسيانىڭ باس ديرەكتورى مەن كاسىپوداق وكىلدەرى جۇمىسشىلارمەن ءتۇسىندىرۋ جۇمىستارىن جۇرگىزگەنىن مالىمدەدى.
"كەزدەسۋ بارىسىندا ولار "جەزقازعانتۇستىمەتال" كومپانياسىندا ەڭ تومەنگى جالاقى 363 مىڭ تەڭگە (جوندەۋ-مەحانيكالىق مامانداندىرىلعان باسقارمانىڭ تازالاۋشىسى), مەديانالىق جالاقى 650 مىڭ تەڭگە ەكەنىن اتاپ ءوتتى. بۇل رەتتە ۇلىتاۋ وبلىسىنداعى مەديانالىق جالاقى 404 105 تەڭگە، ال قازاقستان بويىنشا ورتاشا جالاقى ەكى ەسە از، ياعني 285 677 تەڭگە", – دەپ حابارلايدى ءباسپاسوز قىزمەتى.
200-دەن اسا قىزمەتكەر جالاقىنى كوتەرۋدى تالاپ ەتكەن.
"يندەكساتسيا ۇلتتىق ستاتيستيكا بيۋروسى 2024 جىلعا بەكىتكەن ينفلياتسيا دەڭگەيىنە سايكەس جۇرگىزىلەدى. جالاقى 8,5%-عا ارتقان جاعدايدا كورپوراتسيا بويىنشا ورتاشا جالاقى 822 مىڭ تەڭگەگە (2024 جىلى – 730 431 تەڭگە) جەتەدى. ال جەر استىنداعى ماماندار ءۇشىن 1 303 000 تەڭگە بولادى (2024 جىلى – 1 202 000 تەڭگە). جالاقىنىڭ ودان ءارى كۇرت ءوسۋى ايماقتارمەن جانە سالامەن سالىستىرعاندا ۇلكەن ايىرماشىلىق تۋعىزىدا. سوڭىندا كومپانيانىڭ كەيبىر كەنىشتەرىنىڭ باسەكەگە قابىلەتتىلىگىن تومەندەتىپ، ولاردى توقتاپ قالۋعا اكەلەدى", – دەپ ەسەپتەيدى كورپوراتسيا.
