2025 جىلدىڭ ماۋسىم ايىنان باستاپ ۇلىبريتانيادا ءبىر رەتتىك ەلەكتروندى تەمەكىلەردى ساتۋعا تىيىم سالىنادى، دەپ حابارلايدى "ادىرنا" ۇلتتىق پورتالى The Guardian-عا سىلتەمە جاساپ.
بۇل قۇرىلعىلار ءورت شىعۋ قاۋپىن ارتتىرادى. دەرەكتەرگە سۇيەنسەك ۇلىبريتانيادا ءار سەكۋند سايىن 13 ءبىر رەتتىك ەلەكتروندى تەمەكى قوقىسقا تاستالادى. بۇل كورسەتكىش تاۋلىگىنە 1 ميلليوننان اسادى.
مامانداردىڭ ايتۋىنشا، ءبىر رەتتىك قۇرىلعىلار قۇرامىنداعى باتارەيالار قوقىس تاسىمالدايتىن كولىكتەردە نەمەسە قايتا وڭدەۋ ورتالىقتارىندا ءورت شىعۋىنا سەبەپ بولۋى مۇمكىن. مۇنداي توتەنشە جاعدايلار 2022 جىلمەن سالىستىرعاندا بيىل 71%-عا جيىلەگەن.
ەكولوگتار ءبىر رەتتىك ەلەكتروندى تەمەكىلەردى زياندى جانە ءتيىمسىز دەپ سانايدى. ولاردىڭ قۇرامىندا ليتي مەن مىس بار. بۇل رەسۋرستار 10 مىڭنان استام اۆتوكولىكتى قۋاتپەن قامتاماسىز ەتە الار ەدى. الايدا بۇل ماتەريالدار قايتا وڭدەلمەي، قوقىسقا تاستالۋدا.
"ۆەيپتەردى دۇرىس ۋتيليزاتسيالاۋ تۋرالى اقپاراتتى كوبەيتۋ قاجەت،" – دەپ سانايدى اعىلشىن بەلسەندىلەرى.
وسىعان بايلانىستى، 2025 جىلدىڭ ماۋسىمىنان باستاپ ەلدە تەك قايتا زاريادتالاتىن قۇرىلعىلار مەن تولتىرىلاتىن كارتريدجى بار ەلەكتروندى تەمەكىلەردى ساتۋعا رۇقسات بەرىلەدى.
