مەملەكەت باسشىسى قاسىم-جومارت توقاەۆ پرەمەر-مينيستر ولجاس بەكتەنوۆتى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، قاسىم-جومارت توقاەۆقا ەكونوميكالىق ءوسىمدى قامتاماسىز ەتۋ جانە الەۋمەتتىك ساياساتتى جەتىلدىرۋ بويىنشا تاپسىرمالارىنىڭ ورىندالۋ بارىسى تۋرالى باياندالدى.
ولجاس بەكتەنوۆتىڭ ايتۋىنشا، بيىلعى قاڭتار-قاراشا ايلارىندا جالپى ىشكى ءونىمنىڭ ءوسىمى 4,4 پايىزدى قۇراعان. ەكونوميكانى ءارتاراپتاندىرۋ اياسىندا اۋىل شارۋاشىلىعى (13,4 پايىز), قۇرىلىس (10,3 پايىز), ساۋدا (8,2 پايىز), كولىك (8,1 پايىز), وڭدەۋ ونەركاسىبى (5,3 پايىز), سونىڭ ىشىندە مەتاللۋرگيا (7,2 پايىز) جانە ماشينا جاساۋ (6,9 پايىز), حيميا ونەركاسىبى (8,4 پايىز), سونداي-اق اقپارات جانە بايلانىس (5,3 پايىز) سالالارىندا ءوسىم بايقالعان.
بيىل ەكونوميكانىڭ وسىمىنە مۇنايدان تىس سالالاردىڭ دامۋى ەسەبىنەن قول جەتكىزىلدى. سوعان قاراماستان مۇنايدى يگەرۋدىڭ بولجامدى كورسەتكىشىنىڭ ورىندالماۋى ەكونوميكا دامۋىنىڭ جالپى قارقىنىنا اسەر ەتتى.
مەملەكەت باسشىسىنا وتاندىق وندىرۋشىلەردى قولداۋ جانە تەرەڭ وڭدەۋدى ىنتالاندىرۋ بويىنشا قابىلدانعان شارالاردىڭ ناتيجەسى جونىندە مالىمەت بەرىلدى. اتاپ ايتقاندا، وڭدەلگەن تاۋار ەكسپورتى 10,2 پايىزعا ءوسىپ، 23,3 ميلليارد دوللارعا جەتكەن. تاۋار يمپورتىنىڭ كورسەتكىشى 3,3 پايىزعا كەمىگەن.
نەگىزگى كاپيتالعا سالىنعان ينۆەستيتسيا كولەمى 3,1 پايىزعا ۇلعايعان. بۇل ورايدا شيكىزاتتىق ەمەس سالالاردا ايتارلىقتاي ءوسىم بار.
پرەزيدەنتكە ىسكەرلىك بەلسەندىلىكتى ودان ءارى ارتتىرۋ جانە ايماقتارداعى ءومىر ءسۇرۋ ساپاسىن جاقسارتۋ بويىنشا جۇمىستاردى كۇشەيتۋ جوسپارى تانىستىرىلدى.
كەزدەسۋ سوڭىندا قاسىم-جومارت توقاەۆ وڭدەۋ ونەركاسىبى، اۋىل شارۋاشىلىعى، قۇرىلىس جانە كولىك سالالارىنداعى وڭ ديناميكانى ساقتاۋ باعىتىنداعى جۇمىستى جالعاستىرۋدى تاپسىردى. سونداي-اق ينۆەستيتسيا تارتۋ، الەۋمەتتىك جانە ينجەنەرلىك ينفراقۇرىلىمدى جاڭعىرتۋ، يمپورت الماستىرۋ جانە الەۋمەتتىك ماڭىزعا يە ازىق-تۇلىكتىڭ باعاسىن تۇراقتاندىرۋدى باقىلاۋ بويىنشا بىرقاتار تاپسىرما بەردى.
پرەمەر-مينيستر ولجاس بەكتەنوۆ 13 جەلتوقساندا ماسكەۋدە وتكەن ەۋرازيالىق ۇكىمەتارالىق كەڭەس وتىرىسىنا قاتىسىپ كەلگەن بولاتىن.
