بىرنەشە ەلدە تىيىم سالىنعان تەررورلىق ۇيىم «يسلام مەملەكەتى» (دايش) كابۋلداعى تەراكتىگە جاۋاپكەرشىلىكتى وزىنە الدى. وسى تەراكت ناتيجەسىندە تالىپتەر ۇكىمەتىندە بوسقىندار مەن رەپاترياتسيا ىستەرى بويىنشا ۆيتسە-مينيستر حاليل راحمان حاككاني قازا تاپتى. بۇل تۋرالى Amu.tv جاريالادى، دەپ حابارلايدى “ادىرنا” ۇلتتىق پورتالى.
باسىلىم دايش-ءتىڭ 11 جەلتوقساندا جاريالاعان مالىمدەمەسىنە سىلتەمە جاساپ، تەراكتىنىڭ باستى ماقساتى حاككاني بولعانىن اتاپ وتكەن. ءوزىن-ءوزى ولتىرگەن تەرروريست قاۋىپسىزدىك شارالارىن بۇزىپ، كابۋلداعى مينيسترلىك عيماراتىنا ەنگەن. ول حاككاني ءوزىنىڭ كومەكشىلەرىمەن جانە كۇزەتشىلەرىمەن عيماراتتان شىققانشا كۇتىپ، جارىلعىش زاتپەن بەلدىگىن جارىپ، تەراكتىنى ۇيىمداستىرعان. ناتيجەسىندە مينيستر مەن ونىڭ اينالاسىندا بولعان بىرنەشە ادام قازا تاپتى.
تالىپتەر ءوز كەزەگىندە بۇل تەراكتىگە دايش-ءتى كىنالاپ، بىراق ناقتى قۇرباندار تۋرالى اقپارات بەرمەگەن. اۋعانستانداعى جاڭا بيلىك دايش-ءتى وقشاۋلانعان ۇيىم رەتىندە اتاپ، ونى كەڭ اۋقىمدى قارسىلىق قوزعالىسى دەپ سانامايدى.
58 جاستاعى حاليل راحمان حاككاني 2021 جىلدىڭ 7 قىركۇيەگىنەن باستاپ بوسقىندار ماسەلەسى بويىنشا مينيستر مىندەتىن اتقاردى. ول «حاككاني جەلىسىنىڭ» نەگىزىن قالاۋشى دجالالۋددين حاككانينىڭ ءىنىسى جانە «تاليباننىڭ» ىشكى ىستەر ءمينيسترى ءارى جەلىنىڭ قازىرگى جەتەكشىسى سيرادجۋددين حاككانينىڭ اعاسى. ونىڭ وتباسى ۇزاق ۋاقىت بويى «تاليباننىڭ» وپەراتسيالارى مەن ستراتەگياسىندا ماڭىزدى ءرول اتقاردى.
2011 جىلى اقش قارجى مينيسترلىگى حاليل حاككانينى اسا قاۋىپتى عالامدىق تەرروريستەردىڭ تىزىمىنە ەنگىزدى، ول اۋعانستان مەن پاكىستانداعى «ءال-كايدا» اتىنان جۇرگىزىلگەن ارەكەتتەرىنە بايلانىستى. اقش ۇكىمەتى حاككانينىڭ تۇتقىندالۋىنا اكەلەتىن اقپارات ءۇشىن 5 ميلليون دوللار كولەمىندە سىياقى جاريالادى.
