وڭتۇستىك كورەيا پرەزيدەنتى يۋن سوك يول سوڭعى تەلەۇندەۋىندە وتكەن اپتادا جاريالانعان اسكەري جاعداي شەشىمىنىڭ دۇرىس بولعانىن مالىمدەدى جانە وعان قارسى كوتەرىلىس ايىپتارىن جوققا شىعاردى، دەپ حابارلايدى "ادىرنا" ۇلتتىق پورتالى.
پرەزيدەنت ءوز سوزىندە بۇل شەشىمنىڭ مەملەكەت قاۋىپسىزدىگى مەن مەملەكەتتىك ىستەردىڭ قالىپتى جۇمىسىن قامتاماسىز ەتۋ ءۇشىن قابىلدانعانىن ايتتى. ول بۇل شەشىمدى «تەرەڭ ويلاستىرىلعان ساياسي قادام» دەپ سيپاتتادى.
يۋن سوك يول وتستاۆكاعا كەتۋ تۋرالى شاقىرۋلاردى قابىلدامايتىنىن جانە سوڭىنا دەيىن كۇرەسۋگە دايىن ەكەنىن جەتكىزىپ، وپپوزيتسيانى «يمپيچمەنتپەن ساياسي ويىن وينادى» دەپ ايىپتادى.
«ماعان يمپيچمەنت جاريالانسا دا، تەرگەۋ جۇرگىزىلسە دە، مەن بۇعان ادال تۇردە قارسى تۇرامىن»، – دەدى ول Yonhap اگەنتتىگىنە بەرگەن مالىمدەمەسىندە.
پرەزيدەنتتىڭ مالىمدەمەسى الدىندا بيلەۋشى «حالىق كۇشى» پارتياسىنىڭ جەتەكشىسى حان دون حۋن يمپيچمەنتتى قولدايتىنىن ايتتى. بۇعان دەيىن ول بۇل شاراعا قارسى بولعان ەدى.
دەمالىس كۇندەرى پارلامەنت يمپيچمەنت جاريالاي المادى، ويتكەنى بيلەۋشى پارتيا داۋىس بەرۋدەن باس تارتتى. الداعى داۋىس بەرۋ سەنبى كۇنى وتەدى.
حان دون حۋن ءباسپاسوز ءماسليحاتىندا: «ءبىز ودان ءارى تۇسىنىسپەۋشىلىكتەردى توقتاتۋىمىز كەرەك. قازىر ءتيىمدى ءبىر عانا جول بار. كەلەسى داۋىس بەرۋ كەزىندە پارتيا مۇشەلەرى زالعا كىرىپ، وزدەرىنىڭ سەنىمدەرى مەن ار-ۇجداندارىنا سۇيەنە وتىرىپ، شەشىم قابىلداۋى ءتيىس»، – دەدى.
ول يمپيچمەنتتى قولدايتىنىن اشىق ايتتى.
بۇل ۋاقىتتا سەۋل كوشەلەرىندە نارازىلىق بىلدىرۋشىلەر پرەزيدەنتتىڭ وتستاۆكاعا كەتۋىن تالاپ ەتۋدە.
پرەزيدەنتتىڭ ەلدەن شىعۋىنا تىيىم سالىنعان، ال وتكەن اپتاداعى وقيعالارعا قاتىستى بىرنەشە ۆەدومستۆو جۇرگىزىپ جاتقان تەرگەۋ قارقىندى ءجۇرىپ جاتىر. سارسەنبى كۇنى پوليتسيا پرەزيدەنتتىڭ كەڭسەسىن تىنتۋگە تىرىسقان، بىراق كۇزەت ولاردى كىرگىزبەگەن. كەيىنىرەك كەڭسە شەكتەۋلى قۇجاتتاردى ءوز ەركىمەن تاپسىردى.
