Amnesty International ۇيىمىنىڭ 2023 جىلدىڭ 7 قازانىنداعى وقيعالاردان كەيىنگى يزرايل ارەكەتتەرىنە ارنالعان بايانداماسى قوعام مەن حالىقارالىق قاۋىمداستىق اراسىندا ۇلكەن رەزونانس تۋدىردى، دەپ حابارلايدى "ادىرنا" ۇلتتىق پورتالى.
ۇيىم ءيزرايلدىڭ گازا سەكتورىنداعى ارەكەتتەرىن گەنوتسيد رەتىندە باعالاۋعا بولاتىنىن مالىمدەگەن.
بايانداماعا سايكەس، 42 000-نان استام پالەستينالىق قازا تاپقان، ونىڭ ىشىندە 13 300 بالا بار. 97 000-عا جۋىق ادام جاراقات الىپ، گازانىڭ ينفراقۇرىلىمى، ۇيلەرى مەن اۋرۋحانالارى جاپپاي قيراعان. بۇل ايماقتىڭ باسىم بولىگى ءومىر سۇرۋگە جارامسىز كۇيگە تۇسكەن.
ءيزرايلدىڭ گازاداعى بلوكاداسى ەلەكتر قۋاتى، سۋ، ازىق-تۇلىك پەن ءدارى-دارمەككە قول جەتكىزۋدى شەكتەپ، گۋمانيتارلىق اپاتقا سەبەپشى بولدى. Amnesty International بۇل جاعدايدى قاساقانا جاسالعان ارەكەت رەتىندە باعالايدى.
باياندامادا ءيزرايلدىڭ كەيبىر لاۋازىمدى تۇلعالارىنىڭ پالەستينالىقتارعا قارسى جاسالعان مالىمدەمەلەرى گەنوتسيدتىك ارەكەتتەردى اقتايدى دەپ كورسەتىلگەن. ءيزرايلدىڭ اسكەري وپەراتسيالارىندا ازاماتتىق جانە اسكەري نىساندار اجىراتىلماعان، بۇل كوپتەگەن بەيبىت تۇرعىنداردىڭ قازا تابۋىنا سەبەپ بولعان.
ميلليونداعان پالەستينالىقتار بىرنەشە رەت ءماجبۇرلى قونىس اۋدارۋعا ۇشىراپ، ولاردىڭ گۋمانيتارلىق جاعدايى ودان ءارى ناشارلاعان.
Amnesty International بايانداماسىندا حالىقارالىق قاۋىمداستىقتى يزرايلگە قارۋ-جاراق جەتكىزۋدى توقتاتۋعا جانە گەنوتسيدكە جاۋاپتى تۇلعالاردى جاۋاپقا تارتۋعا شاقىردى. سونداي-اق ۇيىم ءيزرايلدىڭ جوعارى لاۋازىمدى تۇلعالارىنا قاتىستى حالىقارالىق قىلمىستىق سوتتىڭ تەرگەۋ جۇرگىزۋىن تالاپ ەتتى.
يزرايل بۇل ايىپتاۋلاردى ءۇزىلدى-كەسىلدى جوققا شىعارىپ، ءوز ارەكەتتەرىن حاماس ۇيىمىمەن كۇرەسۋ جانە ازاماتتارىن قورعاۋ ماقساتىندا جاسالعان دەپ تۇسىندىرەدى.
بۇل بايانداما حالىقارالىق دەڭگەيدە ۇلكەن پىكىرتالاس تۋدىردى.
