Amnesty International ūiymynyŋ 2023 jyldyŋ 7 qazanyndaǧy oqiǧalardan keiıngı İzrail äreketterıne arnalǧan baiandamasy qoǧam men halyqaralyq qauymdastyq arasynda ülken rezonans tudyrdy, dep habarlaidy "Adyrna" ūlttyq portaly.
Ūiym İzraildıŋ Gaza sektoryndaǧy äreketterın genosid retınde baǧalauǧa bolatynyn mälımdegen.
Baiandamaǧa säikes, 42 000-nan astam palestinalyq qaza tapqan, onyŋ ışınde 13 300 bala bar. 97 000-ǧa juyq adam jaraqat alyp, Gazanyŋ infraqūrylymy, üilerı men auruhanalary jappai qiraǧan. Būl aimaqtyŋ basym bölıgı ömır süruge jaramsyz küige tüsken.
İzraildıŋ Gazadaǧy blokadasy elektr quaty, su, azyq-tülık pen därı-därmekke qol jetkızudı şektep, gumanitarlyq apatqa sebepşı boldy. Amnesty International būl jaǧdaidy qasaqana jasalǧan äreket retınde baǧalaidy.
Baiandamada İzraildıŋ keibır lauazymdy tūlǧalarynyŋ palestinalyqtarǧa qarsy jasalǧan mälımdemelerı genosidtık äreketterdı aqtaidy dep körsetılgen. İzraildıŋ äskeri operasiialarynda azamattyq jäne äskeri nysandar ajyratylmaǧan, būl köptegen beibıt tūrǧyndardyŋ qaza tabuyna sebep bolǧan.
Milliondaǧan palestinalyqtar bırneşe ret mäjbürlı qonys audaruǧa ūşyrap, olardyŋ gumanitarlyq jaǧdaiy odan ärı naşarlaǧan.
Amnesty International baiandamasynda halyqaralyq qauymdastyqty İzrailge qaru-jaraq jetkızudı toqtatuǧa jäne genosidke jauapty tūlǧalardy jauapqa tartuǧa şaqyrdy. Sondai-aq ūiym İzraildıŋ joǧary lauazymdy tūlǧalaryna qatysty halyqaralyq qylmystyq sottyŋ tergeu jürgızuın talap ettı.
İzrail būl aiyptaulardy üzıldı-kesıldı joqqa şyǧaryp, öz äreketterın HAMAS ūiymymen küresu jäne azamattaryn qorǧau maqsatynda jasalǧan dep tüsındıredı.
Būl baiandama halyqaralyq deŋgeide ülken pıkırtalas tudyrdy.
Ūqsas jaŋalyqtar
