اقش-تىڭ قازاقستانداعى ەلشىسى دەنيەل روزەنبليۋم 2025 جىلعى 20 قاڭتاردا ءوز قىزمەتىن اياقتاپ، اقش مەملەكەتتىك دەپارتامەنتىندەگى 28 جىلعا جۋىق مانسابىن ءتامامدايتىنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى اقش-تىڭ قازاقستانداعى ەلشىلىگى مەن كونسۋلدىعىنىڭ ءباسپاسوز قىزمەتى حابارلادى.
«قازاقستانداعى اقش ەلشىسى دەنيەل روزەنبليۋم 26 قاراشادا قازاقستان ۇكىمەتىنە 2025 جىلعى 20 قاڭتاردا قىزمەتىنەن كەتەتىنىن جانە اقش مەملەكەتتىك دەپارتامەنتىندەگى 28 جىلعا جۋىق تابىستى مانسابىن اياقتايتىنىن حابارلادى»، – دەلىنگەن مالىمدەمەدە.
روزەنبليۋم اقش-تىڭ قازاقستانداعى ەلشىلىگىن 2022 جىلعى قاراشادان بەرى باسقارىپ كەلەدى. ول اقش مەملەكەتتىك دەپارتامەنتىندەگى مانسابىن اياقتاۋعا شەشىم قابىلداعان. ەلشىنىڭ مانسابى بەس پرەزيدەنت اكىمشىلىگى مەن سەگىز مەملەكەتتىك حاتشىنى قامتيدى. ول اقش پەن قازاقستان اراسىنداعى نىعايا تۇسكەن ءارى دامۋ ۇستىندەگى قارىم-قاتىناستار اياسىندا ەلدە قىزمەت ەتۋ مۇمكىندىگى ءۇشىن العىسىن ءبىلدىردى.
«قازاقستانداعى اقش ەلشىسى بولۋ مەن ءۇشىن ۇلكەن مارتەبە بولدى. مەن اسىرەسە قازاقستاندىق حالىقتى جاقىننان تانىپ، ەلدىڭ بارلىق وڭىرلەرىنە ساپار جاساپ، ونىڭ بىرەگەي تاريحى تۋرالى كوپ نارسە بىلگەنىمە قۋانىشتىمىن. مۇندا جۇمىس ىستەگەن ۋاقىتىمدا مەن قازاقستاننىڭ مادەنيەتى مەن داستۇرلەرىنە تەرەڭ قۇرمەتپەن قارادىم»، – دەدى ەلشى.
ەسكە سالا كەتسەك، 20 قاڭتاردا دونالد ترامپ اقش-تىڭ 47 پرەزيدەنتى رەتىندە ۇلىقتاۋ ءراسىمىن وتكىزىپ، قىزمەتىنە كىرىسپەك.
