ادام ساۋداسى ادام قۇقىقتارىن بۇزۋدىڭ ەڭ قاتىگەز نىساندارىنىڭ ءبىرى. ادام ساۋداسىنىڭ ەل ەكونوميكاسىنا كەرى اسەرىن تيگىزەتىنىن جانە ەلدىڭ ۇلتتىق قاۋىپسىزدىگىنە قاتەر توندىرەتىنىن ەسكەرە وتىرىپ، قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيا 2006 جىلى ءۇش تىلدە ادام قۇقىقتارىن قورعاۋ تۋرالى نەگىزگى بايانداما جاسادى. 2007 جىلى بۇل ەسەپ بۇۇ-نىڭ ادام قۇقىقتارى جونىندەگى شارتتىق ورگاندارىنا ۇسىنىلدى. قۇجاتتا ادام ساۋداسىنا ەرەكشە نازار اۋدارۋ، ادام ساۋداسىنا قارسى زاڭدار شىعارۋ جانە حالىقارالىق شارتتاردى راتيفيكاتسيالاۋ ۇسىنىلادى. بۇل تۋرالى ورتالىق كوممۋنيكاتسيالار قىزمەتىندە قر پرەزيدەنتى جانىنداعى ادام قۇقىقتارى جونىندەگى كوميسسيا توراعاسىنىڭ ورىنباسارى تاستەمىر ابىشەۆ ايتتى.
ونىڭ ايتۋىنشا، قر ىشكى ىستەر مينيسترلىگى ءتيىستى حاتتامالاردى دايىنداپ، بەكىتكەن.
«بۇل وتە كۇردەلى ماسەلە. بۇل ەلىمىزدىڭ قاۋىپسىزدىگىنە ۇلكەن اسەر ەتەدى. جالپى، ول زاڭسىز تابىس بويىنشا الەمدە ءۇشىنشى ورىندا. ءبىرىنشى ورىندا زاڭسىز قارۋ ساۋداسى، ەكىنشى ورىندا ەسىرتكى بيزنەسى، ءۇشىنشى ورىندا ادام ساۋداسىنىڭ زاماناۋي تۇرلەرى تۇر. ياعني، قاناۋ، ەڭبەك قاناۋ، جىنىستىق قاناۋ، مۇشەلەردى الۋ، قىزدارىمىزدى الداپ، سۋرروگات انا رەتىندە پايدالانۋ. مۇنىڭ ءبارى ادام ساۋداسىنىڭ زاماناۋي تۇرلەرىنە قاتىستى»، - دەدى سپيكەر.
2013 جىلى كوميسسيا ادام ساۋداسىنا قارسى كۇرەس سالاسىنداعى ادام قۇقىقتارىنىڭ ساقتالۋى تۋرالى ەسەپ دايىندادى. بۇل قۇجاتتا ۇكىمەت پەن پارلامەنتكە جەكە زاڭ قابىلداۋ ۇسىنىلىپ وتىر. ودان كەيىن ەڭبەك ميگرانتتارى مەن ادام ساۋداسىنىڭ قۇرباندارىنىڭ قۇقىقتارىن قورعاۋ تۋرالى تالدامالىق بايانداما دايىندالدى.
2020 جىلى تاعى ءبىر ەسەپ دايىندالىپ، وعان مەملەكەت باسشىسى وڭ باعاسىن بەردى. كەيىن سالانى رەتتەۋگە ارنالعان ءتيىستى زاڭ قابىلداندى. تاستەمىر ابىشەۆتىڭ ايتۋىنشا، ەندى بۇل قۇجات نورمالارىن جۇزەگە اسىرۋ ءۇشىن بارلىق جاۋاپتى ورگاندار بىرلەسىپ جۇمىس ىستەۋى كەرەك.
