وڭتۇستىك كورەيا پرەزيدەنتى يۋن سوك يول حالقىنا جولداۋ جاساپ، ەلدە اسكەري توتەنشە جاعداي جاريالانعانىن ايتتى. بۇل تۋرالى Yonhap اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، بۇعان دەيىن وڭتۇستىك كورەيا پرەزيدەنتى شۇعىل كەڭەس وتكىزىپ، وزىنە يمپيچمەنت جاريالاۋ ارەكەتى جاسالعانىن مالىمدەدى. ول وپپوزيتسيانى ەلدىڭ نەگىزگى قىزمەتتەرىن ورىنداۋ ءۇشىن قاجەتتى بارلىق ماڭىزدى بيۋدجەت قاراجاتتارىن قىسقارتتى دەپ ايىپتادى.
وسىعان وراي قازاقستاننىڭ كورەياداعى ەلشىلىگى قازاقستاندىقتارعا ۇندەۋ جاسادى.
“كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان ازاماتتارىن سابىر ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز”، - دەلىنگەن ەلشىلىكتىڭ حابارلاماسىندا.
ەسكە سالا كەتسەك، قاراشا ايىنىڭ ورتاسىندا سولتۇستىك كورەيا وڭتۇستىك كورەياعا 40-قا جۋىق قوقىس شارىن ۇشىرعان ەدى. سونىمەن قاتار جاپونيا، اقش جانە وڭتۇستىك كورەيا بىرلەسكەن اسكەري جاتتىعۋلارىن باستاعان بولاتىن.
ەلدە بۇدان الدىڭعى اسكەري جاعداي 1979 جىلى جاريالانعانى ايتىلادى.
