اقش پرەزيدەنتى دجو بايدەن گازا سەكتورىنداعى اسكەري قيمىلداردى توقتاتۋ ءۇشىن بار كۇش-جىگەرىن سالاتىنىن مالىمدەدى، دەپ حابارلايدى "ادىرنا" ۇلتتىق پورتالى.
يزرايل مەن ليۆانداعى «حەزبوللا» اراسىنداعى ءبىتىم اقش پەن فرانتسيانىڭ دەلدالدىعىمەن جاسالعان كەلىسىمنەن سوڭ كۇشىنە ەنبەك. بۇل تۋرالى تۋرالى دجو بايدەن مالىمدەدى. پرەزيدەنتتىڭ ايتۋىنشا، بۇل كەلىسىم گازا سەكتورىندا باستالعان سوعىس ناتيجەسىندە مىڭداعان ادامنىڭ ءومىرىن قيعان قاقتىعىستى توقتاتۋدىڭ نەگىزىن قالاۋ ءۇشىن جاسالعان ماڭىزدى قادام بولىپ تابىلادى.
يزرايل قاۋىپسىزدىك كەڭەسى كەلىسىمدى 10 داۋىسپەن قولداپ، 1 داۋىس قارسى شىققاننان كەيىن، بايدەن يزرايل پرەمەر-ءمينيسترى بينيامين نەتانياحۋ مەن ليۆان پرەمەر-ءمينيسترى نادجيب ميكاتي اراسىنداعى كەلىسسوزدەر تۋرالى ايتتى. قارۋلى قاقتىعىستار يزرايل مەن ليۆان شەكاراسىندا جەرگىلىكتى ۋاقىت بويىنشا تاڭعى 4:00-دە (گرينۆيچ بويىنشا 02:00-دە) توقتاتىلادى دەپ مالىمدەلدى.
"بۇل تۇراقتى بىتىمگەرلىك بولۋى ءتيىس، «حەزبوللا» جانە باسقا لاڭكەستىك ۇيىمدار ءيزرايلدىڭ قاۋىپسىزدىگىنە قاۋىپ توندىرمەۋى كەرەك", - دەدى بايدەن.
يزرايل كۇشتەرىن بىرتىندەپ 60 كۇن ىشىندە شىعارادى، ال ليۆان ارمياسى يزرايلمەن شەكارالاس اۋماقتاردى ءوز باقىلاۋىنا الادى. بۇل شارالار «حەزبوللانىڭ» ينفراقۇرىلىمىن قالپىنا كەلتىرمەۋىن قامتاماسىز ەتۋ ءۇشىن جاسالادى.
اقش قورعانىس ءمينيسترى للويد وستين بۇل كەلىسىمدى «تاريحي ءسات» دەپ اتاپ، ءيزرايلدىڭ قاۋىپسىزدىگىن قولدايتىنىن جانە ونىڭ ءوزىن-ءوزى قورعاۋ قۇقىعىن مويىندايتىنىن ايتتى. سونىمەن قاتار، ول گازا سەكتورىنداعى گۋمانيتارلىق جاعدايدى جاقسارتۋعا نازار اۋدارۋدىڭ ماڭىزدىلىعىن دا اتاپ ءوتتى.
بۇۇ باس حاتشىسى انتونيۋ گۋتەرريش بۇل كەلىسىمدى قۇپتاپ، تاراپتاردى ءوز مىندەتتەمەلەرىن تولىق ورىنداۋعا شاقىردى.
