بۇگىن موڭعوليا موڭعول حالىق رەسپۋبليكاسىنىڭ جاريالانۋى مەن ءبىرىنشى كونستيتۋتسيانىڭ قابىلدانعانىنا ءجۇز جىل تولعانىن اتاپ ءوتتى، دەپ حابارلايدى "ادىرنا" ۇلتتىق پورتالى مونتسامە-گە سىلتەمە جاساپ.
بۇل كۇنى 1924 جىلى ەل رەسمي تۇردە مونارحيادان باس تارتىپ، رەسپۋبليكا تۇرىندەگى باسقارۋ جۇيەسىن قابىلدادى، وسىلايشا حح عاسىردىڭ زاماناۋي جانە پروگرەسسيۆتى ساياسي جۇيەسىن قابىلداعان ازياداعى العاشقى ەلدەردىڭ ءبىرى بولدى. كونستيتۋتسيا قابىلدانعاننان كەيىن موڭعوليا تەك مونارحيالىق باسقارۋدان باس تارتپاي، حالىقتىڭ نەگىزىندە بيلىك قۇرۋ جۇيەسىنە ءوتتى. سونىمەن قاتار، دەموكراتيالىق يدەيالار مەن قۇندىلىقتاردى كورسەتەتىن زاڭدار ازىرلەندى، بۇل ازاماتتاردىڭ قۇقىقتارى مەن بوستاندىقتارىن نىعايتۋ جولىنداعى ماڭىزدى قادام بولدى. مىسالى، فەوداليزم جويىلدى، تابيعي رەسۋرستار حالىق مەنشىگى دەپ جاريالاندى، ازاماتتاردىڭ داۋىس بەرۋ جانە سايلانۋ قۇقىعى، سونداي-اق ەرلەر مەن ايەلدەر ءۇشىن تەڭ قۇقىقتار زاڭ جۇزىندە بەكىتىلدى. بۇل وزگەرىستەر قازىرگى پارلامەنتتىك باسقارۋدىڭ نەگىزىن قالادى.
موڭعوليانىڭ العاشقى كونستيتۋتسياسى 6 تاراۋدان جانە 50 باپتان تۇرادى. العاشقى كونستيتۋتسيانىڭ 1-بابىندا بىلاي دەپ جازىلعان: "ەندى موڭعوليا موڭعول حالىق رەسپۋبليكاسى دەپ اتالادى، مەملەكەتتىك جوعارعى بيلىك حالىققا تيەسىلى بولادى، بارلىق مەملەكەتتىك ىستەر ۇلى مەملەكەتتىك حۋرال (پارلامەنت) جانە ونىڭ سايلاعان ۇكىمەتى ارقىلى شەشىلەدى."
