بوكستان بەيجىڭ وليمپياداسىنىڭ چەمپيونى باقىت سارسەكباەۆتىڭ اكەسى ومىردەن ءوتتى، دەپ حابارلايدى "ادىرنا" ۇلتتىق پورتالى.
سارسەكباەۆتىڭ اكەسى ءابدىراحمان سارسەكباەۆتىڭ ءوزى دە سپورتتان الىس ەمەس. مارقۇم جاس كەزىندە فۋتبولمەن اۋەستەنىپ، جارتىلاي قورعاۋشى پوزيتسياسىندا ويناعان.
«بالالارىمدى بوكسقا بەرگەن سەبەبىم: شىنى كەرەك، ءبىز تۇرعان تاباقساي دەگەن جەردە باسقا سەكتسيا بولعان دا جوق. باقىت بالا كەزىنەن ۇشقالاق ەمەس ەدى، كەرىسىنشە، ۇقىپتى، سالماقتى بوپ ءوستى. ول بەس جاسىنان باستاپ جاتتىقتى. ۇيىرمەدەگى العاشقى باپكەرى – مەنىڭ قاينىم، ياعني، ايەلىمنىڭ ءىنىسى كارىم ماحمۇدوۆ بولدى. ءالى كۇنگە سول ناعاشىسىنىڭ تاربيەلەۋىمەن كەلەدى عوي»، - دەپ ەستەلىگىن بولىسكەن بولاتىن ءابدىراحمان سارسەكباەۆ.
