نيۋ-يوركتىڭ سوتى اقش-تىڭ بۇرىنعى پرەزيدەنتى دونالد ترامپقا قاتىستى اۋىزباستىرىق بەرگەنى بويىنشا ۇكىم شىعارۋ پروتسەسىن بەلگىسىز مەرزىمگە كەيىنگە قالدىردى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
بۇل ءىس ونىڭ 5 قاراشادا وتكەن پرەزيدەنتتىك سايلاۋدا جەڭىسكە جەتكەننەن كەيىن قايتا قارالۋدا. العاشقى سوت وتىرىسى 26 قاراشاعا جوسپارلانعان بولاتىن.
ترامپتىڭ ءباسپاسوز قىزمەتى سۋديانىڭ شەشىمىن «شەشۋشى جەڭىس» دەپ اتادى، ال قورعاۋشى تاراپ ءىستى جابۋدى تالاپ ەتۋدە.
مامىر ايىندا ترامپقا پورنوجۇلدىز ستورمي دەنيەلسكە 130 مىڭ دوللار تولەگەنى جانە ونى قۇجاتتاردا جاسىرعانى ءۇشىن 34 اۋىر قىلمىس بويىنشا ايىپ تاعىلعان ەدى. اقش تاريحىندا ترامپ قىلمىستىق ءىس قوزعالعان العاشقى پرەزيدەنت بولدى.
نيۋ-يورك سوتىنىڭ سۋدياسى حۋان مەرچان تاراپتارعا الداعى ەكى جارىم اپتا ىشىندە ءىستى ءارى قاراي قالاي جۇرگىزۋ كەرەكتىگى تۋرالى قوسىمشا دالەلدەر ۇسىنۋعا شاقىردى. ترامپتىڭ ادۆوكاتتارى ءىستى دەرەۋ جابۋدى تالاپ ەتىپ، سوتتىڭ جالعاسۋى ونىڭ پرەزيدەنتتىك قىزمەتىنە كەدەرگى كەلتىرۋى مۇمكىن ەكەنىن العا تارتتى. الايدا ايىپتاۋشى تاراپ ۇكىمدى كەيىنگە قالدىرۋعا دايىن ەكەنىن، بىراق ءىستى جابۋعا قارسى ەكەنىن مالىمدەدى.
ترامپتىڭ ءباسپاسوز قىزمەتى سۋديانىڭ شەشىمىن «شەشۋشى جەڭىس» دەپ باعالاپ، بۇل جاعدايدى «ساياسي قۋدالاۋ كەزەڭىنىڭ اياقتالۋى» دەپ اتادى. ترامپتىڭ كوممۋنيكاتسيالار جونىندەگى ديرەكتورى ستيۆەن چۋن:
«پرەزيدەنت ترامپ ۇلكەن جەڭىسكە جەتتى. امەريكان حالقى وعان پرەزيدەنتتىك قىزمەتتى جالعاستىرۋعا ماندات بەردى. بۇل سوت ىستەرى ەندى وتكەننىڭ قالدىعى رەتىندە جويىلادى، ال ءبىز امەريكانى قايتادان ۇلى ەتۋگە نازار اۋدارامىز»، - دەپ حابارلادى.
پرەزيدەنت ترامپ 2016 جىلعى سايلاۋ كەزىندە ستورمي دەنيەلستىڭ ۇنسىزدىگىن قامتاماسىز ەتۋ ءۇشىن “اقشا تولەدى” دەپ ايىپتالعان. ول ءوز كىناسىن مويىنداماي، ءىستى ساياسي استارى بار دەپ سانايدى. ال قورعاۋشى تاراپ بۇل ءىستى دەرەۋ جابۋدى تالاپ ەتۋدە. سوت ءىسىنىڭ ءارى قاراي قالاي جالعاساتىنى ءالى بەلگىسىز.
