2024 جىلدىڭ قاراشا ايىنىڭ 21-ءى تۇركيا رەسپۋبليكاسى انكارا قالاسىندا ورنالاسقان پرەزيدەنتتىك ۇلتتىق كىتاپحانادا «TURKTAV» تۇركى تاريحى جانە مادەنيەتى قورى، «KÖK TUĞ» قازاق مادەنيەتى قاۋىمداستىعىنىڭ ۇيىمداستىرۋىمەن م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى، قر ۇعا اكادەميگى، فيلولوگيا عىلىمدارىنىڭ دوكتورى كەنجەحان ءىسلامجانۇلى ماتىجانوۆتىڭ «قازاقتىڭ وتباسى فولكلورى» اتتى ەڭبەگى «KAZAK AİLE FOLKLORU» دەگەن اتپەن تۇرىك تىلىندە جارىق كوردى.
تۇساۋكەسەر راسىمىندە تۇركيا رەسپۋبليكاسى پرەزيدەنتتىك ۇلتتىق كىتاپحاناسىنىڭ ديرەكتورى ايحان تۋگلۋ، قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىلىگىنىڭ اتتاشەسى دىنمۇحامەد ءومىرالى، تۇركولوگيا عىلىمي-زەرتتەۋ ينستيتۋتى ديرەكتورىنىڭ ورىنباسارى، كىتاپتى تۇرىك تىلىنە اۋدارعان حاليل چەتين، «KOK TUĞ» قازاق مادەنيەتى قاۋىمداستىعىنىڭ باسشىسى قاراگوز احمەتوۆا ارنايى ءسوز الىپ، كەنجەحان ءىسلامجانۇلىن قۇتتىقتاپ، ىزگى تىلەكتەرىن ءبىلدىردى. شارانى «TURKTAV» تۇركى تاريحى جانە مادەنيەتى قورىنىڭ ۆيتسە-پرەزيدەنتى اسەل لاقاەۆا جۇرگىزدى.
سونىمەن قاتار شاراعا انكارا حاجى بايرام ۆەلي ۋنيۆەرسيتەتىنىڭ پروفەسسورى گۇلجانات قۇرمانعاليەۆا-ەرجيلاسۋن، حادجەتتەپە ۋنيۆەرسيتەتى فولكلورتانۋ ءبولىمىنىڭ پروفەسسورى وزگۋل چوبانوگلۋ، «TURKTAV» تۇركى تاريحى جانە مادەنيەتى قورىنىڭ پرەزيدەنتى نيزامەتتين ايكۋرت، م.و. اۋەزوۆ اتىنداعى ادەبيەت جانە ونەر ينستيتۋتىنىڭ ءباسپاسوز حاتشىسى ماعازبەكوۆ نۇر جانە حادجەتتەپە، انكارا حاجى بايرام ۆەلي ۋنيۆەرسيتەتىنىڭ وقىتۋشىلارى، ادەبيەتتانۋشىلار، تاريحشىلار قاتىستى.
كەنجەحان ءىسلامجانۇلى ءوز سوزىندە بارلىق ۇيىمداستىرۋشىلارعا العىسىن ءبىلدىرىپ، تۇركى ەلىنە قازاق حالقىنىڭ ىستىق سالەمىن جولدادى. سونداي-اق اۋدارىلىپ وتىرعان ەڭبەكتىڭ قىسقاشا مازمۇنىمەن تانىستىردى.
«قازاقتىڭ وتباسى فولكلورى» اتتى كىتاپ «تاقىرىپتىڭ تاريحناماسى»، «جانر تابيعاتى»، «الپەشتەۋ فولكلورى»، «ۇيلەنۋ فولكلورى»، «ازالاۋ فولكلورى»، «تاريحي پوەتيكا ماسەلەلەرى» دەپ اتالاتىن التى تاراۋدان قۇرالعان.
تاريحى، تاعدىرى توعىسقان، ءتۇبى ءبىر باۋىرلاس تۇركيا مەن قازاقستان ەلدەرىنىڭ اراسىنداعى ادەبي-مادەني بايلانىستار نىعايىپ، ىنتىماق-بىرلىگى ارتا بەرسىن!
ماعازبەكوۆ نۇر
م.و. اۋەزوۆ اتىنداعى ادەبيەت جانە ونەر ينستيتۋتىنىڭ ءباسپاسوز حاتشىسى
