استانا سوتىندا مارات ايتەنوۆكە قاتىستى قىلمىستىق ءىس قارالۋلا. ول قىلمىستىق كودەكستىڭ 109-بابى (ۇرىپ-سوعۋ) بويىنشا سوتقا تارتىلعان، دەپ حابارلايدى “ادىرنا” ۇلتتىق پورتالى.
مارات ايتەنوۆ سوتتا ايەلىن ۇرماعانىن ايتتى.
“دانا اتەشوۆانى ۇرىپ-سوعىپ، شاشىنان تارتقان ەمەسپىن. داناعا قاۋىپ تونگەننەن كەيىن، بالالارىما قاۋىپ تونگەننەن كەيىن اكە رەتىندە سول جەردە بولدىم. ۇرعان جوقپىن، سوققان جوقپىن، ماجبۇرلەگەن جوقپىن، زورلىق-زومبىلىق كورسەتكەن ەمەسپىن. (دەنەسىنىڭ كوگەرگەنىن) مەن بىلمەيمىن، بىراق ساراپتامادا جازىلعان. ساراپتاما 13 شىلدەدە جاسالعان. ول جاعداي 12 شىلدەدە بولدى. ساراپتامادا ارەكەتتىڭ 1-3 تاۋلىك ارالىعىندا بولعانى جازىلعان. اياق-قولىن ۇستاعانىم راس. باسى جەرگە ۇرىلماسىن دەپ ەكى قولىمدى باسىنىڭ استىنا قويىپ، ۇستاپ تۇرعانىم راس. وعان «ەكەۋمىز سويلەسەيىك» دەپ ۇسىنىس جاساعانىم راس»، - دەدى سوت وتىرىسىندا مارات ايتەنوۆ.
ايتەنوۆ بۇرىنعى ايەلىنە كۇش قولدانۋ تۋرالى ويى بولماعانىن ايتادى.
“تەرىس پيعىلىم بولعان ەمەس. كەرىسىنشە، بالالارىمنىڭ اناسى، بالالارىمدى قاۋىپتەن ساقتايمىن دەگەن ءىس-ارەكەتىم ءۇشىن ايىپتالىپ وتىرمىن. سول ۋاقىتتا ۇيدە سوت ورىنداۋشىلارى بولدى. سوت ورىنداۋشىلاردىڭ كوزىنشە دانا اتەشوۆا توبەلەس شىعارىپ، مەنى سابالاپ جاتقاننان كەيىن، سوت ورىنداۋشىنىڭ شەشىمىن ورىنداۋعا بوگەت بولىپ جاتقاننان كەيىن ونى قاۋىپتەن ساقتاپ قالايىن دەپ ۇسىنىس جاسادىم. «سىرتقا شىعىپ، بەيبىت جولمەن سويلەسەيىك» دەدىم، - دەيدى مارات ايتەنوۆ.
ءىس ماتەريالدارىنا سايكەس، دانا اتەشوۆا وتباسىلىق جانجال كەزىندە مارات ايتەنوۆتى بالاعاتتاعان. ول بىراق بۇل كىناسىن مويىندامادى.
«سوتتا ايەل ءوز كىناسىن مويىندامادى. ول بۇرىنعى جۇبايىن بىلاپىت سوزدەرمەن قورلاماعانىن، تەك بىلاپىت سوزدەر تۇرىندەگى ەتىستىكتى قولدانعانىن ءتۇسىندىردى. سونىمەن بىرگە بۇرىنعى كۇيەۋىنىڭ ۇيدە زاڭسىز بولىپ، ونى ارانداتقانىن جەتكىزدى»، - دەلىنگەن ءىس ماتەريالدارىندا.
اكىمشىلىك قۇقىق بۇزۋشىلىق تۋرالى كودەكستىڭ 73-بابى 1-بولىگىنىڭ سانكتسياسى ەسكەرتۋ جاساۋ نە 5 تاۋلىككە اكiمشiلiك قاماققا الۋعا اكەلەدى.
«ايەلدىڭ جاس بالالارى بار جانە ول قاماققا الۋ قولدانىلمايتىن ادامدار ساناتىنا جاتادى»، - دەلىنگەن اقپاراتتا.
وسىلايشا دانا اتەشوۆاعا جاس بالالارىنىڭ بولۋى جانە قۇقىق بۇزۋشىلىقتى العاش رەت جاساۋى جاۋاپكەرشىلىك پەن جازانى جەڭىلدەتەتىن ءمان-جاي رەتىندە تانىلدى.
سوت ايەلدى كىنالى دەپ تانىپ، ەسكەرتۋ تۇرىندەگى اكىمشىلىك جازا قولدانىلدى.
ايتا كەتسەك، مارات ايتەنوۆ - شىمكەنتتىڭ بۇرىنعى اكىم مۇرات ايتەنوۆتىڭ اعاسى، «استانا» حالىقارالىق قارجى ورتالىعىنىڭ اكىمشىلىگى» اق باسقارما توراعاسىنىڭ ءبىرىنشى ورىنباسارى، «سامۇرىق-قازىنا» ۇاق اق قوعاممەن بايلانىس جونىندەگى باسقارۋشى ديرەكتور قىزمەتىن اتقارعان. سونداي-اق «استانا-قارجى» اق ديرەكتورلار كەڭەسىنىڭ توراعاسى، «اليانس بانك» اق ديرەكتورلار كەڭەسىنىڭ مۇشەسى بولعان.
ەسكە سالا كەتسەك، 15 شىلدە كۇنى مارات ايتەنوۆ قاماۋعا الىندى. ال مارات ايتەنوۆتىڭ بۇرىنعى ايەلىنە ەسكەرتۋ تۇرىندە اكىمشىلىك جازا قولدانىلدى.
