رەسەي ءسىم باتىستى شيەلەنىستى كۇشەيتتى دەپ ايىپتادى، ال پولشا ءسىم بۇل جاعدايدىڭ سەبەبى ماسكەۋدىڭ قاۋىپ-قاتەرى ەكەنىن مالىمدەدى، دەپ حابارلايدى "ادىرنا" ۇلتتىق پورتالى golosameriki.com-عا سىلتەپ.
بەيسەنبى كۇنى رەسەي پولشاداعى اقش-تىڭ زىمىرانعا قارسى قورعانىس بازاسىندا اسكەري دايىندىق دەڭگەيى ارتتى دەپ مالىمدەدى. رەسەي بۇل ارەكەت يادرولىق قاۋىپتىڭ جالپى دەڭگەيىن جوعارىلاتۋى مۇمكىن ەكەنىن ەسكەرتتى.
ۆارشاۆا بولسا، ماسكەۋدەن كەلەتىن تۇراقتى «قورقىتۋ ارەكەتتەرى» ناتو-نىڭ قورعانىس قابىلەتىن ارتتىرۋ قاجەتتىلىگىن دالەلدەيتىنىن ايتتى.
بالتىق تەڭىزىنىڭ جاعالاۋىنا جاقىن رەدزيكوۆو قالاسىندا ورنالاسقان پولشاداعى بازا 13 قاراشادا اشىلدى.
«بۇل – امەريكالىقتاردىڭ جانە سولتۇستىك اتلانتيكالىق اليانس سەرىكتەستەرىنىڭ ستراتەگيالىق سالاداعى تۇراقسىزدىقتى تەرەڭدەتەتىن كەزەكتى ارانداتۋشىلىق ارەكەتى»، – دەدى رەسەي ءسىم وكىلى ماريا زاحاروۆا. «بۇل ستراتەگيالىق تۇراقتىلىقتى بۇزىپ، يادرولىق قاۋىپ دەڭگەيىنىڭ ارتۋىنا اكەلەدى»، - دەلىنگەن مالىمدەمەدە.
پولشا ءسىم وكىلى پاۆەل ۆرونسكي بازادا يادرولىق زىمىراندار جوق ەكەنىن جانە ونىڭ تەك قورعانىس ماقساتىندا قولدانىلاتىنىن اتاپ ءوتتى.
«بۇل بازا قورعانىسقا قىزمەت ەتەدى، شابۋىل جاساۋعا ەمەس»، – دەپ جاۋاپ بەردى ۆرونسكي. «ماسكەۋدىڭ قاۋىپ-قاتەرى پولشا مەن ناتو-نىڭ اۋە شابۋىلىنا قارسى قورعانىسىن كۇشەيتۋ قاجەتتىلىگىن كورسەتەدى جانە بۇل ماسەلە اقش تاراپىنان مۇقيات قاراستىرىلۋى ءتيىس».
رەدزيكوۆوداعى امەريكالىق بازا ناتو-نىڭ Aegis Ashore دەپ اتالاتىن كەڭ اۋقىمدى زىمىرانعا قارسى قالقانىنىڭ بولىگى بولىپ تابىلادى. ناتو مالىمەتىنشە، بازاداعى جۇيەلەر قىسقا جانە ورتا قاشىقتىقتاعى بالليستيكالىق زىمىرانداردى ۇستاپ قالۋعا قابىلەتتى.
«باتىستىق اسكەري نىسانداردىڭ سيپاتى مەن دەڭگەيىن ەسكەرە وتىرىپ، پولشاداعى بۇل بازا جويىلۋى مۇمكىن نىساندار تىزىمىندە ۇزاق ۋاقىتتان بەرى تۇر. بۇل مىندەت زاماناۋي قارۋدىڭ كەڭ اۋقىمىن قولدانۋ ارقىلى قاجەت بولعان جاعدايدا جۇزەگە اسىرىلۋى مۇمكىن»، – دەدى رەسەي وكىلى زاحاروۆا.
ناتو-نىڭ زىمىرانعا قارسى قالقانى پولشا مەن رۋمىنياداعى نىسانداردى، سونداي-اق يسپانياداعى اقش اتك ەسمينەتستەرىن جانە تۇركياداعى ەرتە ەسكەرتۋ رادارىن قامتيدى.
سول كۇنى رەسەي ۋكرايناعا قۇرلىقارالىق بالليستيكالىق راكەتانى (قبر) العاش رەت قولدانعانى حابارلاندى.
21 قاراشاعا قاراعان ءتۇنى ۋكرايناعا جاسالعان شابۋىل يادرولىق قارۋدى قولدانباي جۇزەگە اسىرىلعان.
ەۋرووداقتىڭ سىرتقى ساياسات قىزمەتى بۇل فاكت راستالسا، رەسەيدىڭ قۇرلىقارالىق راكەتانى قولدانۋى قاقتىعىستىڭ شيەلەنىسۋىنە اكەلەتىنىن مالىمدەدى.
