اقش-تاعى Washington Post باسىلىمى ماڭعىستاۋ وبلىسىنىڭ تابيعاتى سۋرەتتەلگەن ماقالاسىن جاريالادى، دەپ حابارلايدى "ادىرنا" ۇلتتىق پورتالى.
"Toyota 4x4 جولسىز، شولەيت جازىق ارقىلى سەكىرىپ ءوتتى. ارتىندا كۇننىڭ ساۋلەسىندە جارقىراپ تۇرعان بوز شاڭ بۇلت قالدى. ال الدا اعارعان تاستاردان تۇراتىن ەرەكشە فورماتسيا اسپانعا شانشىلىپ تۇر", - دەلىنگەن ماقالادا.
باسىلىم وقىرماندارعا جەرگىلىكتى ءومىردى سەزىنۋ ءۇشىن ساپارعا شىقپاس بۇرىن پايدالى كەڭەستەر، جاڭالىقتار مەن نۇسقاۋلىقتار ۇسىنادى دەپ اتاپ كورسەتكەن.
ماقالا اۆتورى، امەريكالىق جۋرناليست دجەننيفەر ميۋللەر، ماڭعىستاۋ وڭىرىنە جاساعان ساپارى بارىسىندا العان اسەرىمەن ءبولىسىپ، ايماقتىڭ ەرەكشە تابيعي لاندشافتتارىن، باي گەولوگيالىق تاريحىن جانە مادەني مۇراسىن حالىقارالىق وقىرمانعا تانىستىردى. جۋرناليست ماڭعىستاۋدىڭ اي بەتىنە ۇقسايتىن كانوندارى مەن جارتاس تۇزىلىمدەرىن اقش-تاعى ايگىلى مونۋمەنت-ۆەللي ۇلتتىق پاركىمەن سالىستىرىپ، ءوڭىردىڭ وزىندىك تابيعي ەرەكشەلىگىنە جوعارى باعا بەرگەن.
ء"بىز قاراعان اڭعار ەجەلدە تەتيس اتتى كونە مۇحيتتىڭ استىندا جاتقان. كەيىن جەر قاباتتارى قوزعالىپ، پانگەيا بولشەكتەنىپ، سۋ تارتىلدى. مىڭداعان جىلدار بويى تابيعات تاستى، الىپ گەولوگيالىق پىشىندەر قالىپتاستىردى. اينالادا قىلىشتاي شانشىلعان جارتاس قاناتتار، كەڭ جايىلعان ۇستىرتتەر مەن يرەك كۇمبەزدەر جازىقتان بوي كوتەرەدى. بۇل جەر سونشالىقتى ۇزاق ۋاقىت قۋاڭ ءارى بوس جاتقاندىقتان، ميلليونداعان جىلدىق تاريح ءالى دە كوزگە انىق كورىنەدى", - دەيدى ساياحاتشى-جۋرناليست.
سونداي-اق، ول ەجەلگى تەتيس مۇحيتىنىڭ ءىزى ساقتالعان ۇستىرتتە تەڭىز جانۋارلارىنىڭ قازبا قالدىقتارى مەن جىبەك جولى بويىنداعى كەرۋەن-ساراي قيراندىلارىنا، سوپىلىق عيباداتحانالار مەن كيەلى ورىندارعا نازار اۋدارعان.
ماقالادا ماڭعىستاۋدىڭ كورىكتى جەرلەرى - بوزجىرا شاتقالى، جىعىلعان ءمۇيىسى، قىزىلقۇپ جانە تورىشتىڭ شارلار القابى كەڭىنەن سيپاتتالىپ، ولاردىڭ ارقايسىسى تابيعاتتىڭ ميلليونداعان جىلدىق تاريحىنان سىر شەرتەتىنى ايتىلعان.
اۆتوردىڭ ايتۋىنشا، ءوڭىر ۇزاق ۋاقىت بويى حالىقارالىق تۋريستەردىڭ نازارىنان تىس قالىپ كەلگەنىمەن، بۇگىندە وعان قىزىعۋشىلىق ارتىپ كەلەدى. ساپار بارىسىندا رەسەيلىك، قىتايلىق جانە يتاليالىق تۋريستەردى كەزدەستىرگەن جۋرناليست امەريكالىق ساياحاتشىلاردىڭ بۇل باعىتقا ەندى عانا بەت بۇرا باستاعانىن اتاپ وتكەن.
سونىمەن قاتار، ماقالادا اقتاۋ قالاسىنىڭ ماڭعىستاۋعا اپاراتىن باستى قاقپا رەتىندەگى ماڭىزى كورسەتىلگەن. كاسپي تەڭىزىنىڭ جاعاسىندا ورنالاسقان اقتاۋ 2025 جىلى تۇركى الەمىنىڭ مادەني استاناسى اتانىپ، حالىقارالىق اۋە قاتىناسىنىڭ قولجەتىمدىلىگىمەن ەرەكشەلەنەدى. قالاعا ستامبۇل، تبيليسي جانە باكۋ قالالارىنان تىكەلەي رەيستەر بار.
