توقاەۆ سوت جۇيەسىن رەفورمالاۋ تۋرالى زاڭعا قول قويدى، دەپ حابارلايدى “ادىرنا” ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى مالىمدەدى.
“مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوت جۇيەسىن رەفورمالاۋ جانە پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى”، – دەلىنگەن حابارلامادا.
جاڭا زاڭعا سايكەس، استانادا قىلمىستىق، ازاماتتىق جانە اكىمشىلىك ىستەر بويىنشا ءۇش كاسساتسيالىق سوت قۇرىلماق. كاسساتسيالىق تارتىپتەگى ىستەر الدىن الا قارالماي، ءۇش سۋديادان تۇراتىن القاعا تىكەلەي جىبەرىلەتىن بولادى. كاسساتسيالىق ساتىداعى ىستەردى قاراۋ مەرزىمى التى ايدان اسپايدى. سوت تالقىلاۋى تاراپتاردىڭ شاقىرىلۋىمەن اۋىزشا جۇرگىزىلەدى.
كاسساتسيالىق سوتقا باس پروكۋروردىڭ ورىنباسارلارى، باس اسكەري جانە كولىك پروكۋرورلارى دا نارازىلىق بەرە الادى. تۇزەتۋلەرگە سايكەس ۇيىمداردى ەكسترەميستىك دەپ تانۋ تۋرالى ازاماتتىق ىستەردى قاراۋ مەرزىمى ءبىر ايدان 10 جۇمىس كۇنىنە دەيىن قىسقارتىلدى.
جوعارعى سوتتا سوت اكتىلەرى جوعارعى سوت سۋدياسىنىڭ ۇسىنىسى بويىنشا ەرەكشە جاعدايلاردا عانا قايتا قارالاتىن بولادى.
