استراحان وبلىسىنان جىبەرىلگەن بالليستيكالىق راكەتا دنەپرگە شابۋىل جاسادى، دەپ حابارلايدى "ادىرنا" ۇلتتىق پورتالى dw.com-عا سىلتەپ.
ۋكراينالىق تاراپتىڭ مالىمەتى بويىنشا، 21 قاراشادا رەسەي اسكەرى دنەپر قالاسىنا ءارتۇرلى تيپتەگى راكەتالار، ونىڭ ىشىندە اەروبالليستيكالىق "كينجال" راكەتاسى، جەتى ح-101 قاناتتى راكەتاسى جانە قۇرلىقارالىق بالليستيكالىق راكەتا (قبر) اتقىلادى. راكەتا استراحان وبلىسىنان ۇشىرىلعان. شابۋىلدىڭ ماقساتى – كاسىپورىندار مەن ماڭىزدى ينفراقۇرىلىم نىساندارى بولدى دەپ حابارلانادى.
ۋكراينا اۋە كۇشتەرىنىڭ مالىمدەۋىنشە، زەنيتتىك اۋە قورعانىس بولىمشەلەرى ح-101 ۇلگىسىندەگى التى راكەتانى اتىپ ءتۇسىردى. باسقا راكەتالار ەلەۋلى زارداپ اكەلمەدى. جارالانعاندار مەن قازا تاپقاندار تۋرالى اقپارات ءالى تۇسپەگەن.
ۋكراينالىق Telegram ارنالارىنىڭ مالىمەتىنشە، دنەپر قالاسىنا رس-26 "رۋبەج" بالليستيكالىق راكەتاسى قولدانىلعان بولۋى مۇمكىن. بۇل راكەتا 2000 جىلداردىڭ ورتاسىندا ازىرلەنىپ، 2011 جىلى العاشقى ۇشۋىن جۇزەگە اسىرعان. ونىڭ ۇشۋ قاشىقتىعى 6000 شاقىرىمعا جەتەدى. بۇعان دەيىن بۇل قارۋ 2017 جىلى قارۋ-جاراق قاتارىنا ەنۋى ءتيىس بولعانىمەن، كەيىنىرەك "يسكاندەر" كەشەنى پايداسىنا الىنىپ تاستالعان
دنەپروپەتروۆسك وبلىستىق اسكەري اكىمشىلىگىنىڭ باسشىسى سەرگەي لىساكتىڭ ايتۋىنشا، شابۋىل سالدارىنان مۇگەدەكتەرگە ارنالعان وڭالتۋ ورتالىعى، قازاندىقتار جانە بىرنەشە ونداعان تەرەزەلەر زاقىمدانعان. سونىمەن قاتار، گاراج كووپەراتيۆىندە ءورت شىعىپ، ەكى جەكە ءۇي بۇزىلعان.
ەگەر قبر قولدانىلعانى راستالسا، بۇل رەسەي-ۋكراينا سوعىسى كەزىندە مۇنداي قارۋدىڭ ءبىرىنشى رەت قولدانىلۋى بولماق. Bloomberg اگەنتتىگىنىڭ مالىمدەۋىنشە، بۇل قادام رەسەيدىڭ يادرولىق قارۋ مۇمكىندىكتەرىن اشىق كورسەتۋگە باعىتتالعان بەلگى بولۋى مۇمكىن.
رەسەي تاراپى قبر قولدانىلعانىن رەسمي تۇردە راستامادى. رەسەي پرەزيدەنتىنىڭ وكىلى دميتري پەسكوۆ جۋرناليستەرگە مۇنداي اقپاراتتى رەسەيلىك اسكەري مەكەمەلەردەن سۇراۋدى ۇسىندى.
سوڭعى كۇندەرى كيەۆتەگى اقش، يسپانيا، يتاليا جانە گرەكيا ەلشىلىكتەرى اۋە شابۋىلدارىنىڭ قاۋپىنە بايلانىستى ءوز جۇمىسىن ۋاقىتشا توقتاتتى.
ايتا كەتەيىك، 19 قاراشادا ۋكراينا العاش رەت امەريكالىق ATACMS زىمىراندارى ارقىلى رەسەي اۋماعىنا سوققى بەردى.
