سىرتقى ىستەر مينيسترلىگىنىڭ رەسمي وكىلى ەرلان جەتىباەۆ قارا تەڭىزدەگى مۇناي تانكەرلەرىنە قاتىستى وقيعالار جونىندە مالىمدەمە جاسادى، دەپ حابارلايدى «ادىرنا» ءتىلشىسى.
ءسىم جاعدايدى باعالاۋ جانە حالىقارالىق قۇقىق نورمالارىن ساقتاۋ ماقساتىندا بىرقاتار ەۋروپالىق مەملەكەتتەردىڭ ەلشىلەرىمەن شۇعىل كەزدەسۋلەر وتكىزىلگەنىن مالىمدەدى.
«مينيسترلىك 13 قاڭتاردا قارا تەڭىز اكۆاتورياسىندا كاسپي قۇبىرى كونسورتسيۋمىنىڭ تەڭىز تەرمينالىنا بەت العان ءۇش تانكەرگە ۇشقىشسىز ۇشۋ اپپاراتتارى ارقىلى جاسالعان شابۋىلدارعا بايلانىستى ايتارلىقتاي الاڭداۋشىلىق بىلدىرەدى. وسى ورايدا بىرقاتار ەۋروپالىق مەملەكەتتەردىڭ ەلشىلەرىمەن وتكىزىلگەن شۇعىل كەزدەسۋلەر، سونداي-اق امەريكالىق تاراپپەن جانە وزگە دە شەتەلدىك سەرىكتەستەرمەن بولعان بايلانىستار بارىسىندا حالىقارالىق قۇقىق نورمالارىن قاتاڭ ساقتاي وتىرىپ، كومىرسۋتەگىن تاسىمالداۋدىڭ، ونىڭ ىشىندە تەڭىز جولدارىنداعى قاۋىپسىزدىگىن قامتاماسىز ەتۋ بويىنشا قاجەتتى شارالار قابىلداۋدىڭ ماڭىزدىلىعىنا ەرەكشە ءمان بەردىك»،-دەلىنگەن حابارلامادا.
سىرتقى ىستەر مينيسترلىگى قازاقستاننىڭ ەشقانداي قارۋلى قاقتىعىسقا قاتىسپايتىنىن، جاھاندىق جانە ەۋروپالىق ەنەرگەتيكالىق قاۋىپسىزدىكتى نىعايتۋعا ەلەۋلى ۇلەس قوسىپ كەلە جاتقانىن جانە ەنەرگيا رەسۋرستارىن جەتكىزۋدىڭ ۇزدىكسىزدىگىن حالىقارالىق تالاپتارعا سايكەس قامتاماسىز ەتىپ وتىرعانىن اتاپ ءوتتى. سونىمەن قاتار، شابۋىلعا ۇشىراعان تانكەرلەردىڭ بارلىق قاجەتتى رۇقساتى بار ەكەنى جانە تالاپ ەتىلگەن سايكەستەندىرۋ جابدىقتارىمەن قامتاماسىز ەتىلگەنى ايتىلدى.
«سوڭعى ۋاقىتتا مۇنداي وقيعالاردىڭ جيىلەۋى حالىقارالىق ەنەرگەتيكالىق ينفراقۇرىلىمنىڭ قالىپتى جۇمىس ىستەۋىنە تونەتىن تاۋەكەلدەردىڭ ارتىپ كەلە جاتقانىن ايعاقتايتىنىن اتاپ وتەمىز جانە سەرىكتەستەرىمىزدى الداعى ۋاقىتتا وسىنداي وقيعالاردىڭ الدىن الۋ ماقساتىندا بىرلەسكەن شارالار ازىرلەۋ ءۇشىن تىعىز ءوزارا ءىس-قيمىل جاساۋعا شاقىرامىز»،-دەپ تولىقتىردى ءسىم.
ەسكە سالايىق، 13 قاڭتاردا كاسپي قۇبىر كونسورتسيۋمى ماڭىندا قازاقستاننان كەلەتىن مۇنايدى كۇتىپ تۇرعان ەكى تانكەرگە درون شابۋىلداعان ەدى. شابۋىلدى ەشكىم موينىنا العان جوق.
