استانا اكىمى جەڭىس قاسىمبەك ەلورداداعى ورتتەن زارداپ شەككەن وتباسىلارعا كومەك كورسەتۋ ماسەلەسى تۋرالى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
17 قاراشا كۇنى تاڭەرتەڭ استانادا ەكى قاباتتى جەكە تۇرعىن ءۇيدىڭ شاتىرى ورتەنىپ، ءتورت بالا قازا تاپقان بولاتىن. بۇل قايعىلى وقيعا قوعام نازارىن اۋدارتىپ، باسپاناسىز قالعان وتباسىلاردىڭ تاعدىرىنا الاڭداۋشىلىق تۋعىزدى.
ورتتەن زارداپ شەككەن العاشقى وتباسى تۇرعىن ءۇي كەزەگىندە تۇرعانى بەلگىلى بولدى. اكىمنىڭ ايتۋىنشا، بۇل وتباسى «كوپبالالى وتباسى» ساناتىندا كەزەكتە قالا بەرەدى.
«كەلەسى جىلى ولاردىڭ كەزەگى كەلەدى، سوندىقتان تۇرعىن ءۇي بەرۋ بويىنشا زاڭ اياسىندا كومەك كورسەتىلەدى»، – دەدى قالا اكىمى جەڭىس قاسىمبەك.
ال ەكىنشى وتباسىعا قاتىستى ۋاقىتشا شەشىم قابىلدانعان. ولارعا قازىر ۋاقىتشا جاتاقحانا بەرىلدى. اكىم بولاشاقتا بۇل وتباسىنىڭ باسپانا ماسەلەسى شەشىلەتىنىن اتاپ ءوتتى.
«بۇل وتباسى پاتەر جالداپ تۇرعان، ءبىز بۇل ماسەلەنى شەشۋ ءۇشىن جۇمىس ىستەپ جاتىرمىز»، – دەپ قوستى ول.
قايعىلى وقيعا كەزىندە ەكى وتباسى تۇرعان تۇرعىن ءۇيدىڭ شاتىرى جارتىلاي وپىرىلىپ ورتەنگەن. ءتورت بالا قايتىس بولعانى حابارلانعاننان كەيىن سوت-مەديتسينالىق ساراپتاما تاعايىندالىپ، ءورتتىڭ سەبەپتەرى زەرتتەلۋدە.
بۇل جاعداي تۇرعىنداردىڭ قاۋىپسىزدىگىن قامتاماسىز ەتۋدىڭ ماڭىزدىلىعىن تاعى دا الدىڭعى قاتارعا شىعاردى. اكىمدىك زارداپ شەككەندەرگە بارىنشا كومەك كورسەتۋگە ۋادە بەرىپ، الداعى ۋاقىتتا قايعىلى وقيعالاردىڭ الدىن الۋ شارالارىن كۇشەيتۋگە نيەتتى ەكەنىن مالىمدەدى.
قايعىلى وقيعا بۇكىل ەل حالقىن ءدۇر سىلكىندىردى. زارداپ شەككەن وتباسىلارعا جان-جاقتى كومەك كورسەتۋ ءاربىر ازاماتتىڭ، مەملەكەتتىڭ جانە جەرگىلىكتى بيلىكتىڭ ورتاق مىندەتىنە اينالدى.
