اق ساندىقتى اشساڭ، كوك ساندىق، كوگىن اشساڭ، سارى ساندىق، ونىڭ ىشىنەن دە ءتۇسى بولەك كىشىگىرىم ساندىقشالار شىعا بەرەتىن قازاقتىڭ ەرتەگىسى بار ەمەس پە ەدى؟ سوسىن الگى ورىستىڭ ماترەشكى قۋىرشاعىنا قاراڭىزشى...
نازارباەۆ ديكتاتۋراسى مەملەكەتتى باسقارۋدىڭ سونداي پيراميداسىن ءتۇزدى. ەڭ بيىكتەگى ەل پرەزيدەنتى مەن الدەبىر ەلەۋسىز مەكەمەدەگى باسشىنى سالىستىرىپ قاراساڭ، كولەمى سايكەس كەلمەسە دە بەينە-بەدەرى ۇقساس، ءتىپتى توعىشارلىق ءتۇر-سيپاتى، توناۋشىلىق ءىس-ارەكەتى ءبىر-بىرىنەن اينىمايتىن.
ەڭ اقىرى جازۋشىلار وداعىنىڭ توراعاسى دا ءوزىن ەرگەجەيلى- نازارباەۆشا ۇستايتىن، قازىرگىلەر توقاەۆتىڭ ءبىر ءتۇرىمىن دەپ ويلايتىن بولعان-اۋ!..
قوعامدىق ۇيىم دەگەن اتى عانا عوي، شىندىعىندا جو-نىڭ زاتى - پرەزيدەنتتى قولداپ-قۋاتتايتىن بيلىكتىڭ ءبىر تارماعى. قولداماي كورسىن، شومىشتەن قاعىپ، شولگە تەنتىرەتىپ جىبەرەدى!
سوڭعى كەزدە وداعىمىز ۇلتتىق قاۋىپسىزدىك كوميتەتىنىڭ ءبىر بولىمىنە اينالىپ كەتكەندەي دە اسەر بار. جىبىر-جىبىر ءبىر تىرلىكتەر جاسالىپ جاتقانداي، تەگى، ونىڭ استارىن باسشىلار عانا بىلەدى، باسقالاردىڭ (مۇشەلەردىڭ) قاتىسى جوقتاي. ەندى نە ماقساتتا ەكەنى تۇسىنىكسىز كادرلار ساپىرىلىسى باستالعان سەكىلدى. داۋلەتكەرەي داۋى بۇگىن شىعىپ جاتىر عوي، ونىڭ ءمان-جايىنان بەيحابارمىز، سوندىقتان تورەلىك ايتۋدان دا اۋلاقپىز. گاپ - باسقادا، ارىدە.
قالىڭ قاۋىم ۇلكەن ءۇمىت كۇتىپ، سەزدە حاتشىلار قۇرامىنا ماجبۇرلەگەندەي قىلىپ ەنگىزگەن نۇرجان قۋانتايدىڭ بۇدان ءبىراز بۇرىن ءۇن-ءتۇنسىز كەتىپ قالعانىن (كەتىرىلگەنىن؟) ەستىپ، تاڭ قالدىم. وۋ، ءبىز ناعىپ بىلمەي قالدىق؟! "قازاق ادەبيەتى" گازەتى مەن "جۇلدىز" جۋرنالىنىڭ رەداكتورلارى اۋىستىرىلىپ، كرەسلو الماسقاندا قانداي قيسىن بار؟
جالپى، وداق باسشىلارىنىڭ ەسەبىن تىڭدايتىن كەز كەلدى.
ر.S. "تيك-توكتا" ءبىر ورىس ايتىپ وتىر: ء"بىز وتان دەگەندى بيلىك دەپ تۇسىنەمىز. بيلىكتەگىلەر دە سولاي ويلايدى. جوق، ولاي ەمەس. بيلىك ەرتەڭ كەتەدى، باسشىلار ورنىنان تۇسەدى، ولەدى، وتان قالادى..." - دەپ.
ءجا، ءبىز وداق دەگەندى قالاي تۇسىنەمىز؟
بولات جەتەكباي
