كەشەدەن بەرى استاناداعى جازۋشىلار وداعىنىڭ باسشىسى اقىن، ۇيىمداستىرۋشىلىق قابىلەتى مىقتى مەنەدجەر داۋلەتكەرەي كاپۇلىن ورنىنان الىپ تاستاپتى دەگەن سىڭايداعى اڭگىمە شىعىپ، قالامگەرلەردىڭ كوبىسى الاڭداپ، الەۋمەتتىك جەلى ۇلارداي شۋلاپ كەتتى. ەكى كۇن بۇرىن عانا تالانتتى اقىن باقىتجان الدياردىڭ 50 جىلدىق مەرەيتويىندا ازعانتاي ۋاقىت سىرلاسقانىمىز بولماسا، ءوز باسىم داۋلەتكەرەيمەن قويان-قولتىق ارالاسقان ەمەسپىن. بىراق، ونىڭ ەلوردادا تۇراتىن قالامگەرلەردىڭ قامىن ويلاپ، تىنىم تاپپاي تەر توگىپ جاتقانىن كۇندە كورىپ ءجۇرمىن. ۇلتتىق كىتاپحانادا تانىمال اقىن -جازۋشىلاردىڭ جارىق كورگەن كىتاپتارىنىڭ تانىستىرىلىمى، دۇنيەدەن وتكەن قالامگەرلەردىڭ مەرەيتويلارى ءوتىپ، نەشە ءتۇرلى كونفەرەنتسيالار ۇيىمداستىرىلىپ تۇرادى. مىنە وسى ءىس-شارالاردىڭ بارىندە دە داۋلەتكەرەي جۇگىرىپ، كوپ جاعدايدا قارجىنى دا ءوزى تاۋىپ، قولىنان كەلگەنشە سىي-سياپاتىن جاساپ جاتادى. مەنىڭ ويىمشا ونى ورنىنان الىپ تاستاۋ ادىلەتكە قيانات بولادى.
قۇدايعا شۇكىر، قازاقتا مىقتى اقىندار كوپ. بىراق مىقتى مەنەدجەرلەر وتە از. مىقتى مەنەدجەر بولۋ، ەكىنىڭ ءبىرىنىڭ قولىنان كەلمەيدى. بۇل ءبىر.
ەكىنشىدەن داۋلەتكەرەيدى ورنىنان الىپ تاستاسا، بۇل وقيعا الدىڭعى تولقىن اعالار مەن كەيىنگى تولقىن ىنىلەردىڭ اراسىنا سىزات تۇسىرەدى. ساياسي بيلىكتىڭ وعان جول بەرمەگەنى دۇرىس. قالامگەرلەردىڭ نارازىلىق كوڭىل-كۇيى حالىققا بەرىلىپ، وتقا ماي قۇيعانداي بولامىز. مەن بۇعان قارسىمىن. كوزقاراسىمىز ءار ءتۇرلى بولعانىنا قاراماستان ۇرپاقتار اراسىندا سىيلاستىق پەن ساباقتاستىق بولۋى ءتيىس. دانىشپان حالقىمىز «التاۋ الا بولسا – اۋىزداعى كەتەدى، تورتەۋ تۇگەل بولسا - توبەدەگى كەلەدى» دەگەندى بەكەر ايتپاعان.
توقسان اۋىز ءسوزدىڭ توبىقتاي ءتۇيىنىن ايتار بولسام، ماسەلەنى ۇشىقتىرىپ، ساياسيلاندىرا بەرمەي، دەموكراتيالىق جولمەن، اقىلداسىپ شەشكەن عانيبەت. مەملەكەتتىك كەڭەسشى ەرلان قاريندى جاقسى تانيمىن. تالاي سويلەسكەنمىن. ناعىز زيالى تۇلعا. ءوز باسىم ونى مەملەكەتشىل ازامات دەپ ەسەپتەيمىن. سىيلايمىن. قۇرمەتىم ەرەكشە. ەرلان باۋىرىمنىڭ ەلوردالىق قالامگەرلەرمەن جۇزدەسۋگە ۋاقىت تاۋىپ، ءبىزدىڭ دە ءسوزىمىزدى تىڭداپ، ماسەلەنىڭ دۇرىس شەشىلۋىنە ىقپال ەتەتىنىنە كامىل سەنىمدىمىن.
Amangeldi Myrzabek
