باتىس قازاقستان وبلىسىنىڭ اكىمى ناريمان تورەعاليەۆ استانادا وتكەن ءباسپاسوز ءماسليحاتىندا باق وكىلدەرىنىڭ تاس جولعا قاتىستى سۇراعىنا جاۋاپ بەردى، دەپ حابارلايدى “ادىرنا” ۇلتتىق پورتالى.
جۋرناليستەر اكىمنەن «بوكەي ورداسى مەن جانىبەك اۋدانى اپاراتىن جول كوپتەن بەرى جىر بولىپ ءجۇر. سالىنىپ جاتقان تاس جولدىڭ قانشاسى اياقتالدى جانە قانشا شاقىرىمى قالدى؟» دەپ سۇرادى.
«بۇگىنگى كۇنى بوكەي ورداسى مەن جانىبەك اۋدانىنا جول سالىنىپ بولدى. قازىر رەسپۋبليكالىق بيۋدەتتەن قارجى ءبولىنىپ، بوكەي ورداسى اۋدانىنىڭ سايقىن اۋىلىنىڭ تۇسىنان حان ورداسىنا دەيىنگى 21 شاقىرىم جولدى جوندەۋ جۇمىستارى ءجۇرىپ جاتىر. بيىلعى جىلدىڭ اياعىنا دەيىن 21 شاقىرىم جول اياقتالاتىن بولادى. ال اۋدان ورتالىقتارى كازتالوۆكا، بوكەي ورداسى جانە جانىبەك اۋدانى وبلىس ورتالىقتارىمەن تىكەلەي بايلانىستىرىلدى ياعني جول جەتتى»، – دەدى وبلىس اكىمى.
