باتىس قازاقستان وبلىسىنىڭ اكىمى ناريمان تورەعاليەۆ استانادا وتكەن ءباسپاسوز ءماسليحاتىندا باق وكىلدەرىنىڭ زاشاعان كەنتىنە قاتىستى سۇراققا جاۋاپ بەردى، دەپ حابارلايدى “ادىرنا” ۇلتتىق پورتالى.
«بۇعان دەيىن ورال قالاسىنىڭ ىرگەسىندەگى زاشاعان كەنتىنىڭ اتاۋىن اۋىستىرۋ تۋرالى باستاما كوتەرىلگەن بولاتىن. 65 مىڭ حالىق تۇراتىن زاشاعان كەنتىنىڭ اتاۋى قاشان اۋىسادى؟» دەگەن ءجۋرناليستىڭ سۇراعىنا اكىم جاۋاپ بەردى.
«وسىنداي ماسەلەنى حالىقپەن كەزدەسۋدە كوتەرىپ جۇرەدى. بۇگىنگى كۇنى بۇل ماسەلە كۇن تارتىبىندە تۇرعان جوق. سەبەبى قازىر ەلدى مەكەندەردىڭ اتاۋىن اۋىستىرۋ، مەكتەپ، كوشە اتتارىن بەرۋگە قاتىستى موراتوري جاريالاندى. سوندىقتان بۇل ماسەلە بۇگىنگى كۇنى اشىق ماسەلە» – دەدى وبلىس اكىمى.
