الماتى وبلىسىنىڭ پوليتسيا دەپارتامەنتى “حۋتورسكي” بانداسىنىڭ باسشىسى دەلىنگەن حاسان قاسىمباەۆقا قاتىستى بۇلتارتپاۋ شاراسى بەلگىلەنگەنىن حابارلادى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ مالىمەتىنشە، قوناەۆ قالاسىنىڭ مامانداندىرىلعان تەرگەۋ سوتى قاسىمباەۆتى ەكى ايعا قاماۋعا الۋ تۋرالى قاۋلى شىعارعان. قاسىمباەۆ 2 قاراشادا ۇستالعان. قازىر ول ۋاقىتشا ۇستاۋ يزولياتورىندا.
ول دەنساۋلىققا قاساقانا اۋىر زيان كەلتىردى جانە ادام ۇرلادى دەگەن ايىپقا ىلىنگەن. مۇنىڭ ءبارى 2021 جىلدىڭ ماۋسىمىندا بولعان وقيعالار.
“قازىرگى ۋاقىتتا قىلمىستاردىڭ بارلىق ءمان-جايلارىن جان-جاقتى، تولىق جانە وبەكتيۆتى زەرتتەۋدى قامتاماسىز ەتۋ ءۇشىن تەرگەۋ ارەكەتتەرىنىڭ كەشەنى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكتسيالاۋ ءۇشىن سوتقا جىبەرىلدى”، – دەپ ناقتىلادى پوليتسيا.
الماتى وبلىسى پوليتسيا دەپارتامەنتى تاراتقان اقپاراتقا قاراعاندا 2021 جىلعى ماۋسىمدا ا. ەسىمدى ازاماتتىڭ دەنساۋلىعىنا قاساقانا اۋىر زيان كەلتىرىپ، سول كىسىنى ۇرلادى دەگەن كۇدىكپەن بەس ازامات ۇستالعانىن حابارلاعان. ۇستالعانداردىڭ ءبىرى – حاسان قاسىمباەۆ. ولاردى الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوت سوتتاپ، قازىرگى ۋاقىتتا قىلمىسكەرلەر جازاسىن باس بوستاندىعىنان ايىرۋ ورىندارىندا وتەپ جاتىر.
حاسان قاسىمباەۆتىڭ ەسىمى تالعارداعى 16 جاستاعى شەرزاتتىڭ قازاسىنان كەيىن قالاداعى بۇزاقىلىق، قىلمىستىق ىستەردىڭ ارتىندا تۇرعان باستى ادام، “حۋتور” ۇقت-نىڭ جەتەكشىسى رەتىندە ايتىلا باستادى. الايدا رەسمي ورگاندار مۇنى تەرىستەپ، تالعاردا ەشقانداي قىلمىستىق توپ جوق، اتالعان وقيعالار بويىنشا كۇدىكتىلەردىڭ حاسان قاسىمباەۆپەن بايلانىسى انىقتالمادى دەگەن. حاسان قاسىمباەۆ تا كوپشىلىككە ۇندەۋ جولداپ، ءوزىنىڭ قاندايدا ءبىر قىلمىستىق ارەكەتتەرمەن بايلانىسىن جوققا شىعارعان. “حاساندى” قورعاپ ۇندەۋ جاساعان اۋىلداستارى ونى قايىرىمدى، اۋىلعا، مۇقتاج ادامدارعا بەلسەنە قول ءۇشىن بەرەتىن ادام رەتىندە سيپاتتاعان. جۋىردا قوعامدىق رەزونانسقا اينالعان ىستەن كەيىن حاسان قاسىمباەۆتىڭ اعاسى اسلان قاسىمباەۆ تالعار اۋدانى اكىمى اپپاراتىنىڭ باسشىسى قىزمەتىنەن بوساتىلعان.
