بۇگىن جەتىسۋ وبلىسىنىڭ پانفيلوۆ اۋدانى جاركەنت قالاسىندا «جايلى مەكتەپ» ۇلتتىق جوباسى اياسىندا سالىنعان 1200 ورىندى جاڭا مەكتەپ پايدالانۋعا بەرىلدى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
مەكتەپتىڭ اشىلۋ سالتاناتىنا جەتىسۋ وبلىسى اكىمىنىڭ ورىنباسارى دياس ەسداۋلەتوۆ، ارداگەر ۇستازدار، مەكتەپ ۇجىمى، اتا-انالار مەن وقۋشىلار، اۋدان جۇرتشىلىعى قاتىستى.
- بۇل – پرەزيدەنت تاپسىرماسىمەن «جايلى مەكتەپ» ۇلتتىق جوباسى اياسىندا سالىنعان وبلىسىمىزداعى العاشقى ءبىلىم وشاعى. پانفيلوۆ اۋدانى – وبلىستاعى وقۋشى سانى كوپ اۋدانداردىڭ ءبىرى. جاڭادان پايدالانۋعا بەرىلىپ وتىرعان بۇل مەكتەپكە جاركەنت قالاسىنىڭ بالا سانى كوپ 9 مەكتەبىنەن 1100 جۋىق بالا قابىلدانىپ وتىر. وسىنداي زامانۋي مەكتەپتە بىلىممەن سۋسىندايتىن وقۋشىلار وبلىسىمىزدان توپ جارىپ شىعاتىنىنا سەنىمىم زور. مەكتەپ ۇستازدارىنا ەلىمىزدىڭ بولاشاق ءبىلىمدى، ەڭبەكقور پاتريوتتارىن تاربيەلەۋ جولىندا ساتتىلىك تىلەيمىن! - دەدى د. ەسداۋلەتوۆ.
جاڭا دا جايلى مەكتەپتىڭ اشىلعانىنا اتا-انالار دا قۋانىشتى.
- ءبىزدىڭ جاركەنت قالاسىنا وسىنداي جايلى مەكتەپ سالىپ بەرگەندەرىڭىز ءۇشىن بارشا اتا-انالاردىڭ اتىنان العىس ايتامىز. مەنىڭ قىزىم قازىر 11 سىنىپتا وقيدى. بالالاردىڭ ۇبت-عا، ەمتيحاندارعا ساپالى دايىندالۋىنا مۇندا بارلىق مۇمكىندىكتەر جاسالعان، وقۋ زالدارى بار كىتاپحاناسى، ماتەريالدىق بازاسى مىقتى ءپان كابينەتتەرى – ءبارى دە وقۋشىلاردىڭ ساپالى ءبىلىم الۋىنا ءوزىنىڭ ۇلكەن ىقپالىن تيگىزەدى دەپ ويلايمىن، - دەدى اتا-انالار كوميتەتىنىڭ توراعاسى ايدار بەكتەمىرۇلى.
مۇنان سوڭ مەكتەپتىڭ لەنتاسى قيىلىپ، جينالعان كوپشىلىك جاڭا عيماراتتىڭ ءىشىن ارالاپ كوردى.
مەكتەپ زاماناۋي تالاپقا ساي جابدىقتالعان. مۇندا 64 كابينەت بولسا، ونىڭ 6-ى جاڭا موديفيكاتسيالىق كابينەت، سونىڭ ىشىندە حيميا، فيزيكا، بيولوگيا، روبوتوتەحنيكا، STEAM كابينەتتەرى، نانو تەحنولوگيا ت.ب. بار. جالپى بارلىق ءپان كابينەتتەرى قاجەتتى ادىستەمەلىك، تەحنيكالىق قۇرالدارمەن جابىقتالعان. سونىمەن قاتار اعاش، مەتالل، تىگىن جانە باسقا دا شەبەرحانالار قاراستىرىلعان. اكت زالى، 2 وقۋ زالى بار كىتاپحانا، 230 ورىندى اسحانا، 2 سپورت زالى، 1 بي زالى وقۋشىلاردىڭ يگىلىگىنە قىزمەت ەتەدى. وعان قوسا وقۋشىلاردىڭ وقۋ قۇرالدارىنا، كيىمگە ارنالعان جەكە شكافتار، سونداي-اق كىتاپ وقۋعا، بالالاردىڭ شىعارماشىلىق دامۋى مەن دەمالۋىنا كوۆوركينگ ايماقتار قاراستىرىلعان.
مەكتەپ ديرەكتورىنىڭ مىندەتىن اتقارۋشى ايگۇل دارۋباەۆانىڭ ايتۋىنشا، قازىرگى كەزدە مەكتەپتە 46 جيىنتىق كلاسس اشىلعان. جاركەنت قالاسىنداعى بالا سانى كوپ توعىز مەكتەپتەن سىنىپتار جەتەكشىلەرىمەن بىرگە اۋىسىپ كەلگەن. بۇگىنگى كۇنى پەداگوگتەر ءۇشىن 30 بوس ورىن، تەحنيكالىق قىزمەتكەرلەرگە 20 ورىنعا كونكۋرس جاريالانىپ، جۇمىسقا قابىلدانۋ ۇستىندە.
- مەكتەپتەگى فيزيكا، حيميا، بيولوگيا جانە روبوتوتەحنيكا پاندەرى بويىنشا زاماناۋي كابينەتتەردە touch-ەكراندار ورناتىلىپ، مەكتەپتىڭ كەز كەلگەن جەرىنەن جىلدامدىعى جوعارى ينتەرنەتكە قوسىلۋ مۇمكىندىگى بەرىلەدى. ەرەكشە ءبىلىم الۋدى قاجەت ەتەتىن بالالارعا ءتيىستى جاعدايلار جاسالعان. باستاۋىش جانە جوعارى سىنىپ وقۋشىلارى مەكتەپتە بولەك بلوكتاردا وقيدى. عيماراتتا بالالار ءۇشىن بەينەباقىلاۋ، دىبىستىق حابارلاۋ جانە باسقا دا كۇشەيتىلگەن قاۋىپسىزدىك شارالارىنا ارنالعان جابدىقتار ورناتىلعان، - دەيدى ا. دارۋباەۆا.
جالپى بيىل وبلىستا 5 مەكتەپتىڭ قۇرىلىسى ءجۇردى. بۇعان دەيىن وسى وقۋ جىلىندا كوكسۋ اۋدانى، قاراتال اۋىلىندا 120 ورىندى مەكتەپ ىسكە قوسىلعان بولسا، جىل سوڭىنا دەيىن اقسۋ اۋدانى، كوشكەنتال اۋىلىندا 180 ورىندى جاڭا مەكتەپ اشىلادى. ال قالعان 2 مەكتەپ، ياعني الاكول اۋدانى، دوستىق اۋىلىنداعى 600 ورىندى جانە پانفيلوۆ اۋدانى، تالدى اۋىلىنداعى 300 ورىندى مەكتەپتەر 2025 جىلعى جاڭا وقۋ جىلىندا ىسكە قوسىلادى دەپ جوسپارلانعان.
