قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى سەيىلجان احمەتوۆ قازاقستاندا قانشا قازاقستاندىق ءوزىن بانكروت دەپ جاريالاپ جانە قانداي سوماعا بانكروت بولعانىن ايتتى، دەپ حابارلايدى “ادىرنا” ۇلتتىق پورتالى.
بۇگىن ورتالىق كوممۋنيكاتسيالار قىزمەتىندە "بانكروتتىق جانە ازاماتتاردىڭ تولەم قابىلەتتىلىگىن قالپىنا كەلتىرۋ راسىمدەرىن جەڭىلدەتۋ" تاقىرىبىندا ءباسپاسوز ءماسليحاتى ءوتتى.
ءباسپاسوز ءماسليحاتى بارىسىندا قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى سەيىلجان احمەتوۆ 2023 جىلعى 3 ناۋرىزدان باستاپ، ياعني تۇزەتۋلەر كۇشىنە ەنگەن ۋاقىتتان بەرى سوتتان تىس بانكروتتىق ءراسىمىن قولدانۋ بويىنشا 131 مىڭنان استام ءوتىنىش تۇسكەنىن حابارلادى.
"مەملەكەتتىك كىرىستەر ورگاندارىندا 6,6 مىڭ ءوتىنىش قارالىپ جاتىر. 8 مىڭ ازاماتقا قاتىستى راسىمدەر جۇرگىزىلۋدە، 2 مىڭنان استام ادامنىڭ بانكورتتىق ءراسىمى توقتاتىلدى. 215 ءوتىنىش كەرى قايتارىلدى. 17,9 مىڭ ادام بانكروت دەپ تانىلدى، قارىز سوماسى 40 ملرد تەڭگە", - دەدى سپيكەر.
ونىڭ سوزىنشە، وتىنىشتەر سانى بويىنشا الماتى قالاسى، سونداي-اق الماتى، جامبىل جانە تۇركىستان وبلىستارى كوش باستاپ تۇر.
بۇل رەتتە سوت 45 ادامدى بانكروت دەپ تانىپ، 13,6 ملرد تەڭگە قارىز كەششىرىلدى.
"جاقىندا ءبىز بانكروتتىق تۋرالى وتىنىشتەردى قارادىق، ەر ادام – 53 پايىز، ال ايەلدەر 47 پايىز بولدى. ورتا ەسەپپەن ءوتىنىش بەرۋشىلەردىڭ باسىم بولىگى 40-42 جاس ارالىعىنداعى تۇرعىندار. قارىزدىڭ ورتاشا مولشەرى بىرنەشە مىڭ تەڭگەدەن 2 ميلليارد تەڭگەگە دەيىن، - دەپ تۇيىندەدى ءسوزىن سەيىلجان احمەتوۆ.
قارجى مينيسترلىگى مەملەكەتتىك كىرىستەر كوميتەتىندەگى باسقارما باسشىسى مەرۋەرت سيسەمباەۆا "ەرلى-زايىپتىلاردىڭ ءبىرىن بانكروت دەپ تانۋ ولاردىڭ نەسيە الۋ مۇمكىندىگىنە اسەر ەتە مە؟" دەگەن سۇراققا جاۋاپ بەردى.
"جالپى، يپوتەكا ماقۇلدانا ما، جوق پا ونى بانك وكىلدەرى شەشەدى. زاڭ بويىنشا "بانكروت" دەپ تانىلسا، وندا 5 جىل بويىنا نەسيە بەرىلمەيدى، - دەدى ول.
ەسكە سالايىق، 2023 جىلدىڭ 3 ناۋرىزىندا قازاقستاندا قارىزى بار ازاماتتارعا ءوزىن بانكروت دەپ جاريالاۋعا مۇمكىندىك بەرەتىن زاڭ كۇشىنە ەندى. 2024 جىلى بانكروتتىق ءراسىمى بويىنشا بىرقاتار تالاپتاردى الىپ تاستاۋ ارقىلى ايتارلىقتاي جەڭىلدەتىلدى.
