فەرعانا وبلىسى كۇشتەپا اۋدانىنىڭ سوتى وزبەكستان ازاماتى ا.ح.-نى رەسەي جاعىندا سوعىس قيمىلدارىنا قاتىسقانى ءۇشىن بەس جىلعا باس بوستاندىعىنان ايىردى. ۇكىم 4 قاراشادا جاريالاندى، دەپ حابارلايدى «ادىرنا” ۇلتتىق پورتالى UzNews.uz سايتىنا سىلتەپ.
قىلمىستىق ءىس ماتەريالدارىندا كورسەتىلگەندەي، ايىپتالۋشى 2023 جىلدىڭ مامىر ايىندا رەسەيگە جۇمىس ىستەۋگە كەتكەن. العاشىندا ەڭبەك قىزمەتىمەن اينالىستى، بىراق قاراشا ايىندا «ماتەريالدىق پايدا ءۇشىن» رەسەي فەدەراتسياسى قورعانىس مينيسترلىگىمەن ءبىر جىل مەرزىمگە كەلىسىم-شارتقا وتىرىپ، قارۋلى كۇشتەر قاتارىنا قوسىلعان.
اقپارات بويىنشا، وزبەكستان ازاماتى رەسەي-فينليانديا شەكاراسىنا جاقىن ورنالاسقان بازادا وقۋ-جاتتىعۋدان ءوتىپ، وعان قارۋدى قولدانۋ جانە جاۋىنگەرلىك ءىس-قيمىل نەگىزدەرى ۇيرەتىلگەن. اعىمداعى جىلدىڭ قاڭتار ايىندا جالدامالى وقۋ-جاتتىعۋ جيىندارىن جالعاستىرۋ ءۇشىن بەلگورود وبلىسىنداعى پوليگونعا اۋىستىرىلعان.
ءبىر ايدان كەيىن دايىندىقتى اياقتاعاننان كەيىن ا.ح. ۇرىستارعا قاتىسقان. بىراق كوپ ۇزاماي ول دروننان تاستالعان سناريادتىڭ جارىلۋىنان اۋىر جاراقات، باسىنان، قولىنان جانە اياعىنان جاراقات العان.
“جالدامالى ماسكەۋ وبلىسىنداعى اسكەري گوسپيتالعا ورنالاستىرىلىپ، وندا ءبىر ايعا جۋىق جاتتى. سودان ماۋسىم ايىندا ميگرانت ەلىنە ورالىپ، قىلمىستىق ءىس بويىنشا ايىپتالۋشىعا اينالدى. الايدا شەتەلدىكتىڭ رەسەي قورعانىس مينيسترلىگىنەن قانداي دا ءبىر تولەم العان-الماعانى كورسەتىلمەگەن.
سوت وتىرىسى بارىسىندا سوتتالۋشى ءوز كىناسىن مويىنداپ، وكىندى. وسى فاكتىنى جانە ازاماتتىڭ تەرگەۋمەن بەلسەندى ىنتىماقتاستىعىن ەسكەرە وتىرىپ، وعان جالدامالىلىق بابىندا (قىلمىستىق كودەكستىڭ 154-بابىنىڭ 1-بولىگى) كوزدەلگەن ەڭ تومەنگى مەرزىم – بەس جىل باس بوستاندىعىنان ايىرۋ جازاسى تاعايىندالدى. ول جازاسىن جالپى رەجيمدەگى كولونيادا وتەيتىن بولادى” دەلىنگەن مالىمەتتە.
وسىعان ۇقساس جاعدايلار بۇرىن دا تىركەلگەن. 2024 جىلدىڭ شىلدە ايىندا قاراقالپاقستاننىڭ (وزبەكستان قۇرامىنداعى ەگەمەندى رەسپۋبليكا) سوتى جەرگىلىكتى تۇرعىندى جالدامالىلىعى ءۇشىن ءۇش جىلعا باس بوستاندىعىن شەكتەۋگە ۇكىم شىعارعان بولاتىن. ميگرانتتىڭ رەسەي ارمياسىندا دايىندىقتان وتكەنىمەن، ۇرىس ايماعىنا جىبەرىلمەس بۇرىن وتانىنا قاشىپ كەتكەنى ناقتىلاندى.
وسى جىلدىڭ قازان ايىندا تاعى ءبىر وزبەكستان ازاماتى رەسەي-ۋكراينا قاقتىعىسىنا قاتىسقانى ءۇشىن ءۇش جىلعا باس بوستاندىعىنان ايىرىلعان. سوت وتىرىسىندا ول وسى ەلدىڭ ازاماتتىعىن الۋ ءۇشىن رەسەي فەدەراتسياسىنىڭ قارۋلى كۇشتەرى قاتارىنا قوسىلۋعا شەشىم قابىلداعانىن ايتتى.
