تەگەراندا يسلامدىق كيىم ۇلگىسىنىڭ ەنگىزىلۋىنە نارازىلىق رەتىندە كيىمىن شەشكەن ستۋدەنت قىز ۇستالدى، دەپ حابارلايدى «ادىرنا» ۇلتتىق پورتالى DW-گە سىلتەمە جاساپ.
باق حابارلاۋىنشا، ۇستالعان قىز سوققىعا جىعىلعان. Amnesty International ۇيىمى ونى بوساتۋدى جانە قۇقىق قورعاۋ ورگاندارىنىڭ ارەكەتتەرىن تەرگەۋدى تالاپ ەتۋدە.
وقيعانىڭ كۋاگەرلەرى تۇسىرگەن ۆيدەولار، سەنبى كۇنى يراندىق الەۋمەتتىك جەلىلەردە، ودان كەيىن باق-تا تارادى. ۆيدەولاردىڭ بىرىنەن جالاڭاش قىزدىڭ ستۋدەنتتىك قالاشىقتى ارالاپ، كەيىن ۋنيۆەرسيتەت جانىنداعى تاس پاراپەتكە وتىرىپ جاتقانىن كورۋگە بولادى.
باسقا ءبىر جازبادا قاراپايىم كيىمدەگى ەر ادامدار ستۋدەنت قىزدى كولىككە كۇشتەپ وتىرعىزىپ، بەلگىسىز باعىتقا الىپ كەتكەنى تۇسىرىلگەن. Amir Kabir Newsletter ستۋدەنتتىك باسىلىمىنىڭ حابارلاۋىنشا، قىز حيدجابتى «دۇرىس» كيمەگەنى ءۇشىن «باسيدج» اسكەري قۇراماسىنىڭ ساربازدارى ەسكەرتۋ جاساپ، ونىڭ كيىمىن جىرتقاننان كەيىن شەشىنگەن. ۇستاۋ كەزىندە قىزدى سوققىعا جىعىپ، باسىن كولىكتىڭ ەسىگىنە نەمەسە باعاناعا ۇرعان، بۇل قان كەتۋگە الىپ كەلگەن دەپ جازادى باسىلىم. ستۋدەنتتىڭ اتى-ءجونى ايتىلمادى.
Amnesty International قۇقىق قورعاۋ ۇيىمى يران بيلىگىنەن كيىمدى جابىق كيۋدى تالاپ ەتكەن قاۋىپسىزدىك قىزمەتكەرلەرىنىڭ زاڭسىز كۇش قولدانۋىنا نارازىلىق ءبىلدىرۋ ءۇشىن شەشىنگەننەن كەيىن ۇستالعان ۋنيۆەرسيتەت ستۋدەنتىن دەرەۋ بوساتۋدى تالاپ ەتتى. «ۇستاۋ كەزىندە ونى ۇرىپ-سوعۋ جانە سەكسۋالدىق زورلىق-زومبىلىق كورسەتۋ ايىپتاۋلارى تاۋەلسىز ءارى بەيتاراپ تەرگەۋدى قاجەت ەتەدى»، - دەپ اتاپ ءوتتى قۇقىق قورعاۋشىلار.
ۋنيۆەرسيتەت وكىلى ۇستالعان ستۋدەنتتىڭ پسيحيكالىق اۋرۋى بار ەكەنىن ايتىپ، ونى كلينيكاعا جىبەرگەندەرىن مالىمدەدى.
يرانداعى بارلىق ايەلدەر شاشتارىن ورامالمەن جابۋعا جانە كەڭ كيىم كيۋگە مىندەتتى. بۇل تالاپتى بۇزعانداردى بيلىك «اياۋسىز قۋدالايتىنى» مالىمدەدى. ولاردى «اقىلدى كامەرالار» ارقىلى انىقتاۋ جوسپارلانۋدا. قازىرگى ۋاقىتتا ەل پارلامەنتى حيدجاب كيۋ ەرەجەلەرىن قاتاڭداتاتىن زاڭ جوباسىن قاراستىرىپ جاتىر. بۇل يدەيانى كونسەرۆاتيۆتى يسلام ءدىنباسىلارىنان تۇراتىن كونستيتۋتسيانىڭ قورعاۋشىلار كەڭەسى ماقۇلدادى.
