جەتىسۋداعى قاراتال اۋدانىنىڭ ەڭ شالعاي ەلدى مەكەنى – كوپبىرلىك اۋىلىنىڭ تۇرعىندارى ساپالى اۋىز سۋعا قول جەتكىزدى. اۋىلدا ورتالىقتاندىرىلعان سۋ قۇبىرى بولعانىمەن، سوڭعى جىلدارى تۇرعىندار تۇزدى سۋ ىشۋگە ءماجبۇر بولعان ەدى. ماسەلەنىڭ قالاي شەشىلگەنىن بۇگىن وبلىس اكىمى بەيبىت يساباەۆ قاراتال اۋدانىنا بارعان جۇمىس ساپارى بارىسىندا ارنايى كورىپ قايتتى، دەپ حابارلايدى جەتىسۋ وبلىس اكىمىنىڭ ءباسپاسوز قىزمەتى.
ەسكە سالساق، 2010 جىلى اۋىلدا سۋمەن جابدىقتاۋ جۇيەسى قايتا جاڭعىرتىلعان ەدى، اتاپ ايتقاندا جاڭا جەلىلەر سالىنىپ، تەرەڭدىگى 100 مەتردەن اساتىن ۇڭعىما قازىلىپ، تۇششىلاندىرۋ قوندىرعىسى ورناتىلدى، ىسىرمالارى اۋىستىرىلدى. قابىلدانعان شارالارعا قاراماستان، سوڭعى جىلدارى سۋدىڭ تۇزدىلىعى ليترىنە 5,9 گرامنان 8 گرامعا دەيىن وسكەن، سوندىقتان بۇل اۋىل حالقىن مازالاعان ماسەلەگە اينالعان بولاتىن.
وسىعان بايلانىستى وبلىس اكىمى بەيبىت يساباەۆتىڭ تاپسىرماسىنا سايكەس بيۋدجەتتەن قاراجات ءبولىنىپ، ماسەلەنى شەشۋگە قاجەتتى شارالار قابىلداندى. اتاپ ايتقاندا، 2 كم جەلىگە قايتا جاڭعىرتۋ جۇرگىزىلىپ، جاڭا سۋ مۇناراسى تۇرعىزىلدى، وعان قوسا تۇزدانۋ دەڭگەيى ليترىنە ءتىپتى 12 گراممعا جەتكەن كۇندە دە سۋدى تۇششىلاندىرۋعا قۋاتى جەتەتىن جاڭارتىلعان تۇششىلاندىرۋ قوندىرعىسى ورناتىلدى.
وبلىس اكىمى كوپبىرلىك اۋىلىنا بارعان ساپارىندا سۋدىڭ ساپاسىن كورىپ، تۇرعىندارمەن جولىقتى. وسى ورايدا كەزدەسۋگە قاتىسقان اۋىل تۇرعىندارىنىڭ ءبىرى زامزاگۇل نەسىپباەۆا:
- اۋىز سۋ – تىرشىلىكتىڭ نەگىزى كوزى، دەنساۋلىقتىڭ كەپىلى. سوندىقتان ونىڭ ساپاسىنىڭ جاقسى بولعانى ماڭىزدى. بىزدە بىرنەشە جىلدان بەرى اۋىز سۋ ساپاسى ناشار بولاتىن. بيىل بۇل ماسەلە ءسىزدىڭ قولداۋىڭىزبەن شەشىمىن تاپتى، حالىق ريزا. اۋىلىمىزعا بۇدان بىلاي دا كوڭىل بولىنەدى دەپ سەنەمىز، - دەدى.
اتاپ وتسەك، كوپبىرلىك اۋىلدا 179 اۋلا بار، سونىڭ 168-ءى ورتالىق سۋمەن جابدىقتاۋ جۇيەسىنە قوسىلعان. اۋىلدا تۇراتىن حالىق سانى 900-دەن اسادى.
