بۇگىنگى سۇحباتىمىز ۇلتتىق ۇلانىندا قىزمەت ەتىپ جۇرگەن كينولوگ-مامان كىشى سەرجانت (توپ باستىعى) 5571 اسكەري ءبولىمىنىڭ 1 جەدەل ماقساتتاعى باتالونىنىڭ جاۋىنگەرلىك قامتاماسىز ەتۋ روتاسىنىڭ كينولوگيا قىزمەتى ماماندار توبىنىڭ ءبولىنىس باستىعى الىپبەك قۇرمانبەك جايلى بولماق.
الىپبەك قۇرمانبەك قاراعاندى وبلىسى، اباي اۋدانىنىڭ تۋماسى. بۇگىندە 2018 جىلدان باستاپ الىپ مەگاپوليستە ورنالاسقان 5571 اسكەري بولىمىندە قىزمەت ەتەدى. وتان الدىنداعى بورىشىن وتەي سالىسىمەن، 2011 جىلى كەلىسىمشارت بويىنشا 6505 اسكەري بولىمىنە قىزمەتكە ورنالاسقان. سودان بەرى ۇلتتىڭ مۇددەسى ءۇشىن ەڭبەك ەتىپ كەلەدى.
بۇل ومىردەگى ادامعا قويىلاتىن ەڭ باستى تالاپتىڭ ءبىرى – ادامي اسىل قاسيەتتەردى بويىڭا ءسىڭىرۋ. مەن اتا-انامنىڭ ىزگىلىك، كىشىپەيىلدىلىك، مەيىرىمدىلىك، ادامگەرشىلىك سەكىلدى قاسيەتتەرىن سىڭىرە ءبىلدىم. سول كىسىلەردىڭ ارقاسىندا قاناتىم قاتايدى، وتانعا دەگەن سۇيىسپەنشىلىگىم ارتتى. جالپى ومىردە ادامداردىڭ يماندىلىعىن، ۇقىپتىلىعىن باعالايمىن.
- اسكەري سالاعا قالاي، قاشان كەلدىڭىز؟
- 2009 جىلى اسكەر قاتارىنا شاقىرىلىپ، مەرزىمدىك قىزمەت ساربازى اتانىپ، ءوزىمنىڭ وتان الدىنداعى بورىشىمدى وتەپ شىقتىم. وتان الدىنداعى قىزمەتىمدى تارازداعى شەكارا وتريادىندا وتەدىم. وندا كينولوگ قىزمەتىندە بولدىم. اسكەر قاتارىنداعى قىزمەتىمدى بولاشاق ومىرىمەن بايلانىستىرىپ، 2015 جىلدىڭ جەلتوقسان ايىندا قۇقىقتىق ءتارتىپ اسكەرىنىڭ 5571 اسكەري بولىمىنە تىل قىزمەتىندە ءىس جۇرگىزۋشى مامانى بولىپ كەلىسىمشارت بويىنشا قىزمەتكە ورنالاستىم. كەيىن اراعا ءبىر جىل سالىپ 2016 جىلى قاراكەمەردەگى وقۋ ورتالىعىنان ءبىلىم الىپ كەلگەننەن كەيىن كينولوگيا قىزمەتىنە اۋىستىم. بۇگىندە قاراماعىمدا التى اسكەري قىزمەتشىسى بار كينولوگيا توبىن باسقارىپ وتىرمىن. وسى جولدى تاڭداعانىما ەشقاشان وكىنبەيمىن. ال وعان مەنىڭ اتا-انام ارقاشان سەنىممەن قاراپ، دەمەپ وتىرادى.
- قىزمەتتىك ءيتىڭىز تۋرالى كەڭىرەك اڭگىمەلەپ بەرىڭىز. قانشا ءيتىڭىز بولدى؟ يتتەردى قالاي باپتايسىز؟ قانداي تاسىلدەرمەن جاتتىقتىراسىز؟
توعىز جىلدىق قىزمەتىمدە ءوزىم جەكە ۇيرەتكەن ءۇش ءيتىم بولدى. قازىرگى قىزمەت ەتىپ جۇرگەن ءيتىم «رويا» دەپ اتالادى. ول بەلگيالىق وۆچاركالاردىڭ مالينۋا دەگەن تۇرىنە جاتادى.
كينولوگ بولۋ – وتە قىزىق كاسىپ. قىزمەت ۋاقىتىمدا وزىمە بەكىتىلگەن ءيتىمدى جاتتىقتىرامىن، سەرۋەندەتەمىن، كۇتىپ-باپتايمىن، تۇرعان ورنىن تازالاپ، ونىڭ دۇرىس تاماقتانۋىنا كوڭىل بولەمىن. دەگەنمەن، يتتەرمەن كۇندەلىكتى جاتتىعۋ جاساپ تۇرۋ قاجەت. ءبىز جاتتىعۋدىڭ كوبىنە ويىن ءادىسىن قولدانامىز، ءتاتتى بەرىپ ەركەلەتەمىز. يت – وتە سەزىمتال جانۋار. ول يەسىنىڭ كوڭىل كۇيىن سەزىپ تۇرادى. يەسىنە وتە ادال.
قازىرگى قىزمەتتىك ءيتىم وسىنداي جاتتىعۋلاردىڭ ارقاسىندا ەڭبەگىمدى اقتاپ ادال قىزمەت ەتۋدە. بىرنەشە رەسپۋبليكالىق جارىستاردان جۇلدەلى ورىنداردى يەلەندىك. ءتورت اياقتى سەنىمدى سەرىگىم – قازىر كۇش قۋاتى تاسىعان قىزمەتتىك يت.
- ءوز يتىڭىزبەن بىرگە قىزمەتتە قانداي كورسەتكىشتەرگە قول جەتكىزدىڭىزدەر؟ مىسالمەن ايتىپ بەرسەڭىز. قىلمىسكەردى ۇستاۋدا، جوعالعان ادامدى ىزدەۋدە نەمەسە ەسىرتكى زاتتارىن تابۋدا جانە تاعى باسقا اتاپ وتەرلىك قانداي وقيعالار بولدى؟
- ءبىرىنشى ءيتىم «بارىس» اسكەرگە 8 جىل قىزمەت ەتىپ، «زەينەتكە» شىققان. نەمىس وۆچاركاسى قىزمەت ەتكەن جىلدارى ءتۇرلى قىلمىستاردىڭ اشىلۋىنا ات سالىستى. الماتىعا اۋىسقانعا دەيىن سول يتپەن قىزمەت اتقاردىم. جاقسى جاعىنان كوزگە ءتۇسىپ، جارىستاردان ۇنەمى جۇلدەلى ورىندارعا يە بولاتىنبىز. ول قىزمەتتىك يت پاترۋلدىك ىزگە ءتۇسۋشى يت بولاتىن. قىزمەت اتقارۋ بارىسىندا ادام ءولتىرۋ فاكتىسى بويىنشى قىلمىستى اشتى. پولتسيا بىزدەن كومەك سۇراپ، ءيتتى ىزگە سالدىق. سول قىلمىس جاساعان جەردەن 800 مەتر ارا-قاشىقتىقتا تىعىلىپ وتىرعان جەرىنەن قىلمىسكەردى تاپتىق. اسكەر كولەمىندە وتكەن جارىستارعا قاتىسىپ، العىر يت رەتىندە تالاي جۇلدەلەردى دە جەڭىپ الدىق.
ال رويامەن ەكى رەت جارىسقا قاتىستىم. ەكى جارىستا دا ءۇشىنشى ورىنعا يە بولدىق. ءبىزدىڭ باعىتىمىز جارىلعىش زاتتاردى ىزدەۋ.
ودان كەيىن «روي» ەسىمدى يتپەن توپ باستىعى بولعانعا دەيىن جۇمىس جاسادىم. بۇل يتتەر جارىلعىش زاتتاردى ىزدەيدى. مۇنداي يتتەرمەن ءبىرىنشى جۇمىس ىستەگەن كەزدە ءبىز ءيتتى الدىمەن كۇشىك كەزىنەن باستاپ تاڭدايمىز. دوپقا قىزعۋشىلىعى بار ما، ءتيپى قانداي سونى ەسكەرەمىز، ىزدەيمىز. ول حولەريك پە، سونگۆينيك پە سونى انىقتايمىز. ەكىنشىدەن، ۇيرەتۋ بارىسىندا ءيتتى ويناتۋ ارقىلى جۇمىس ىستەپ، ونى قورقىتىپ الماۋىمىعا تىرىسامىز. ودان كەيىن جايلاپ يىسكە ۇيرەتۋ ادىستەرىن قولدانامىز. يت 1 جاسقا تولعاننان كەيىن جارىلعىش زاتتاردىڭ يىسىنە قويىلادى. ماسەنلەن ءارتۇرلى جارىلعاش زاتتاردىڭ ءيىسى بار. ءتورت اياقتى سەنىمدى سەرىك تولىق قىزمەتتىك يت بولىپ سانالۋ ءۇشىن 7-8 ءيىستى تولىق سەزىپ اجىراتا ءبىلۋى كەرەك. ەكى جاستان كەيىن وسىنداي كۇتىپ باپتاۋ ۇيرەتۋلەردىڭ ناتيجەسىندە يت قىزمەتكە دايىن بولادى.
- قىزمەت پەن وتباسى قاتار جۇرەدى. وزىڭىزگە قولداۋ كورسەتىپ جۇرگەن وتباسىڭىز تۋرالى ايتىپ وتسەڭىز؟
- جۇبايىم اقبوپە بەگىمبەتوۆا مەن 2013 جىلى شاڭىراق كوتەردىك. سودان بەرى اللا بەرگەن ەكى ۇل، ەكى قىزدى تاربيەلەپ وتىرمىز. قىزىم رايانا 9 جاستا. ودان كەيىن نۇرتىلەك جەتى جاستا، رامازان 4 جاستا، بالاباقشاعا بارىپ ءجۇر جانە 8 ايلىق ايىم ەسىمدى قىزىم بار. مەن وقۋ-جاتتىعۋلارعا كەتكەن كەزدە ۇيدەگى بالا-شاعاما اتا-انام باس كوز بولىپ وتىرادى. ۇيدەگى جارىم دا قاس-قاباعىما قارايدى. مەنى ءتۇسىنىپ، ۇنەمى سىيلاپ وتىرادى.
- ۇل بالالاردى تاربيەلەپ وتىر ەكەنسىز. بالاڭىز اكە جولىن قۋىپ، اسكەري بولامىن دەگەن تاڭداۋ جاساسا، قالاي قارايسىز؟
- ارينە، ەگەر اسكەر جولىن تاڭداپ جاتسا، قۋانا قابىلدايمىن. بالامنىڭ تاڭداۋىن ارقاشان قولدايمىن! «اكە كورگەن وق جونار» دەمەكشى، ۇلىم مەن ۇيگە كەلگەن كەزدە اسكەري كيىمدەرىمدى كيىپ الىپ وينايدى. «اكە، مەن وسكەندە پولكوۆنيك بولامىن» - دەيدى. بولاشاقتا بالالارىمنان ۇلكەن ءۇمىت كۇتەمىن. وتان قورعاۋ – ابىرويلى ءىس. ابىرويلى ءىستى ابىرويمەن الىپ جۇرگەنگە جەتەتىن دۇنيە جوق.
- سۇحباتىڭىزعا راقمەت! قىزمەتىڭىزگە تابىس تىلەيمىن!
اياۋلىم ماديكانوۆا
