تيك-توكتىڭ قوجايىنى قىتايداعى ەڭ باي ادام اتانىپتى. چجان ءيميننىڭ داۋلەتى 50 ملرد دوللارعا جەتكەن. ونىڭ شىرىگەن باي بولۋىنا ءبىزدىڭ قازاقتار دا ءبىر كىسىدەي اتسالىسۋدا.
ويتكەنى مۇرات ءابىلدا مەن سامپو، ماپوح پەن جاپوك دەگەندەردىڭ تىكەلەي ەفيردەگى باتلىنا ءبىزدىڭ باسسىزدار ارىستان، ارعىماق سياقتى قىپ-قىزىل اقشا تۇراتىن ستيكەرلەر سىيلايدى. ال، تۇسكەن اقشانىڭ 40 پايىزىن تيك-توك ۇستاپ قالادى ەكەن.
دەمەك قازاقتىڭ اقشاسى قىتاي اسىپ جاتىر دەگەن ءسوز. ال، ياندەكس ارقىلى رەسەيگە دە ءبىراز قارجىمىز كەتۋدە. بۇرىن برازيليادان قانت، اۋستراليادان قوي ەتىن الىپ، اقشامىز سىرتقا اعىلىپ جاتىر دەپ اعىل-تەگىل بولۋشى ەدىك. ەندى باسى ىستەيتىن جۇرتتار بار بايلىعىمىزدى سمارتفون ارقىلى سورۋدا.
ونەر-ءبىلىم بار جۇرتتار،
تاستان ساراي سالعىزدى.
ايشىلىق الىس جەرلەردەن
جىلدام حابار العىزدى-دەپ ىبىراي التىنسارين اتامىز ءبىلىپ ايتقان ەكەن عوي. ءبىز ەكاتەرينا II مەن ۆانگا اجەيگە تاڭقالىپ جۇرسەك…
دياس نۇراقىن
Facebook پاراقشاسىنان
