قاراعاندى وبلىسىنا قاراستى ساران قالاسىنىڭ اكىمى ەركىن باۋلىقوۆ قالادا جىلۋ بەرۋ ماۋسىمىنىڭ باستالۋىندا ولقىلىق جىبەرگەنى ءۇشىن قىزمەتىنەن بوساتىلدى. قالا باسشىسى قىزمەتىن ۋاقىتشا ماقسات قايرەشوۆ اتقاراتىن بولدى. بۇل تۋرالى وبلىستىق اكىمدىك مالىمدەدى، دەپ حابارلايدى “ادىرنا” ۇلتتىق پورتالى.
"قاراعاندى وبلىسى اكىمىنىڭ وكىمىمەن ساران قالاسىنىڭ اكىمى ەركىن باۋلىقوۆ قالادا جىلۋ بەرۋ ماۋسىمىنىڭ باستالۋىندا ولقىلىق جىبەرگەنى ءۇشىن اتقاراتىن قىزمەتىنەن بوساتىلدى", - دەلىنگەن اكىمدىكتىڭ رەسمي سايتىندا جاريالانعان اقپاراتتا.
اكىمدىك مالىمەتىنشە، قالا باسشىسى مىندەتىن ۋاقىتشا وسىعان دەيىن ساران قالاسى اكىمىنىڭ ورىنباسارى بولعان ماقسات قايرەشوۆ اتقارادى.
ەسكە سالساق، بۇعان دەيىن قاراعاندى وبلىسىنداعى ساران قالاسىندا قالا تۇرعىندارى الەۋمەتتىك جەلىدە جىلۋسىز وتىرعانىن ايتىپ، شاعىمدانعان ەدى. كەيىن ساران قالاسىنىڭ اكىمى ەركىن باۋلىقوۆ وسى ماسەلەگە قاتىستى ۆيدەوۇندەۋ جولدادى.
ۇكىمەت وتىرىسىندا وسى ماسەلە كەزەكتەن تىس كوتەرىلىپ، پرەمەر-مينيستر ولجاس بەكتەنوۆ قالاداعى جاعداي بويىنشا تەكسەرىس ءجۇرىپ جاتقانىن، تەكسەرۋ ناتيجەسى بويىنشا ماتەريالدار قۇقىق قورعاۋ ورگاندارىنا جىبەرىلەتىنىن ايتتى.
ال 16 قازاندا سارانداعى ۇيلەردى ماماندار قايتادان ەسكى قازاندىقتارعا قوسىپ جاتقانى ءمالىم بولدى. 28 قازاندا قىزمەتتىك مىندەتتەرىن تيىسىنشە ورىنداماعانى ءۇشىن، اتاپ ايتقاندا، جىلىتۋ ماۋسىمىنا دايىندىقتى جەتكىلىكسىز تۇردە باقىلاعانى ءۇشىن ساران قالاسىنىڭ اكىمى ەركىن باۋلىقوۆ پەن قاراعاندى وبلىسىنىڭ ەنەرگەتيكا جانە تكش باسقارماسىنىڭ باسشىسى تىلەكتەس دوساەۆ قاتاڭ سوگىس العانى، ال وبلىس اكىمىنىڭ ءبىرىنشى ورىنباسارى ازامات تايجانوۆقا ەسكەرتۋ تۇرىندە تارتىپتىك جازا جاريالانعانى ءمالىم بولدى.
