قازاقستان پرەزيدەنتى قاسىم-جومارت توقاەۆ رەسەيدىڭ قازان قالاسىندا وتكەن «بريكس+» سامميتىنە قاتىستى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا ءباسپاسوز قىزمەتى مالىمدەدى. مەملەكەت باسشىسى «بريكس+» سامميتىنە قاتىسىپ، پلەنارلىق وتىرىستا ءسوز سويلەدى. ءوز سوزىندە بريكس ۇيىمىنىڭ جاھاندىق ىقپالدىلىق ورتالىعىنا اينالىپ جاتقانىن جانە ءوزارا ءتيىمدى ىنتىماقتاستىققا ۇمتىلعان كوپتەگەن ەلدەردىڭ وعان قىزىعۋشىلىق ءبىلدىرىپ وتىرعانىن اتاپ ءوتتى.
«بريكس-ءتىڭ دامۋعا دەگەن زور الەۋەتى بار جانە ول ءارتۇرلى كونتينەنتتەردىڭ مەملەكەتتەرىن بىرىكتىرىپ، بارلىق قاتىسۋشىلاردىڭ يگىلىگى ءۇشىن ورتاق مۇمكىندىكتەردى ءتيىمدى پايدالانا وتىرىپ، ىنتىماقتاستىقتى نىعايتادى. بريكس بولاشاقتى بىرلەسكەن وركەندەۋ، ءوزارا قۇرمەت پەن سەرىكتەستىك قاعيداتتارىنا نەگىزدەلە وتىرىپ قۇرۋ ءۇشىن قاجەتتى رەسۋرستار مەن تاجىريبەگە يە»، - دەدى پرەزيدەنت.
قازاقستان پرەزيدەنتىنىڭ پىكىرىنشە، بريكس-ءتىڭ كوپجاقتى كۇش-جىگەرى بۇۇ قىزمەتىن ۇيلەسىمدى تولىقتىرادى. ويتكەنى بۇۇ الەمدىك تۇراقتىلىق پەن قاۋىپسىزدىكتى قامتاماسىز ەتەتىن امبەباپ قۇرىلىم بولىپ قالا بەرەدى.
«قازاقستان بۇۇ قاۋىپسىزدىك كەڭەسىن رەفورمالاۋدى جانە ونى افريكا، لاتىن امەريكاسى جانە ازيادان جاڭا مۇشەلەرمەن كەڭەيتۋدى قولدايدى. عالامدىق وڭتۇستىك ەلدەرىنىڭ داۋىستارى بەيبىتشىلىك پەن قاۋىپسىزدىك ماسەلەلەرىن شەشۋدە ماڭىزدى ءرول اتقارۋى ءتيىس. بريكس بۇل ۇدەرىستە نەگىزگى ءرول اتقارا وتىرىپ، ورتاشا دەرجاۆالار مەن دامۋشى ەكونوميكالاردىڭ جاھاندىق باسقارۋ قۇرىلىمىنداعى وكىلدىگىن كۇشەيتە الادى. قازاقستان بريكس-ءتى جاھاندىق پروگرەستىڭ قوزعاۋشى كۇشتەرىنىڭ ءبىرى رەتىندە قاراستىرادى»، - دەپ اتاپ ءوتتى توقاەۆ.
ال رەسەي پرەزيدەنتى ۆلاديمير ءپۋتيننىڭ بريكس جۇمىسىنا قازاقستاننىڭ بەلسەندى ارالاساتىنىنا ءۇمىتى زور.
«قۇرمەتتى پرەزيدەنت مىرزا، ءسىز بريكس-ءتىڭ دامۋىنا نازار اۋدارىپ، وعان جوعارى باعا بەردىڭىز، سونداي-اق، ەلدەرىڭىزدەگى ساۋدا اينالىمىنىڭ 50%-ى بريكس ەلدەرىنە تيەسىلى ەكەنىن اتاپ ءوتتىڭىز. بۇل ءبىزدىڭ ءوزارا ءىس-قيمىلىمىزدىڭ ناقتى ماڭىزدى قۇرامداس بولىگى. ارينە، لوگيستيكا دا ماڭىزدى. ءبىز مۇنى تۇسىنەمىز جانە وعان ۇلكەن ءمان بەرەمىز. ءبىز بىرلەسكەن جۇمىسىمىزعا بەلسەندى قاتىسادى دەپ ۇمىتتەنەمىز»، – دەدى پۋتين بريكس+/اۋتريچ فورماتىنداعى بريكس ءسامميتىنىڭ قورىتىندى وتىرىسىندا.
ەسكە سالا كەتەيىك، قازاقستان پرەزيدەنتى بريكس سامميتىنە قاتىسۋ ءۇشىن قازانعا ساپارلادى. وسى قارساڭدا قازاقستاننىڭ جاقىن ارادا بۇل ۇيىمعا قوسىلۋعا نيەتتەنبەيتىنى ايتىلدى. ەلدەگى ساراپشىلار بۇل مالىمدەمەنى ءارتۇرلى قابىلدادى.
