تۋريزم جانە سپورت ءمينيسترى ەربول مىرزابوسىنوۆ بەكزات ساتتارحانوۆ پەن دەنيس تەننىڭ اناسىمەن كەزدەستى، دەپ حابارلايدى “ادىرنا” ۇلتتىق پورتالى.
استانادا مينيستر داڭقتى بوكسشى، سيدنەي وليمپياداسىنىڭ چەمپيونى بەكزات ساتتارحانوۆتىڭ اياۋلى اناسى سىرلىكۇل ساتتارحانوۆانى جانە الەمگە قازاقستاندى تانىتقان مانەرلەپ سىرعاناۋشى، سوچي وليمپياداسىنىڭ قولا جۇلدەگەرى دەنيس تەننىڭ اناسى وكسانا تەندى قابىلدادى.
كەزدەسۋ بارىسىندا ەربول مىرزابوسىنوۆ ەل بايراعىن كوكتە جەلبىرەتىپ، ءانۇرانىمىزدى تارتىستى باسەكەلەردە شىرقاتقان ساڭلاقتاردىڭ ەسىمى ەل ەسىندە ەكەنىن جەتكىزدى. ولاردىڭ رۋحىن ۇلىقتاۋ جولىندا قوس انانىڭ ايانباي ەڭبەك ەتىپ جۇرگەنىن اتاپ ءوتتى.
“حالقىمىز "الىپ انادان تۋادى" دەپ بەكەر ايتپاعان. شىنىندا دا، ادام بويىنداعى اسىل قاسيەت پەن تاۋداي تالاپ انانىڭ اق سۇتىمەن داريدى. انا بالاسىنا بەرگەن تاربيەسى مەن شەكسىز ماحابباتى ونىڭ بولاشاعىنا جارقىن جول اشادى. سىزدەر ۇلدارىڭىزدى سپورت ۇيىرمەسىنە قارشادايىنان جەتەلەپ اپارىپ، چەمپيون اتانۋى ءۇشىن بارلىق جاعدايدى جاسادىڭىزدار. ساڭلاقتارىمىز ارامىزدان الىستاپ كەتسە دە، ولاردىڭ رۋحىن ۇلىقتاۋ، ەسىمىن ەل جادىندا ماڭگى ساقتاۋ جولىندا ايانباي ەڭبەك ەتىپ جۇرگەندەرىڭىزگە كۋامىز. باتىرلارىمىزدىڭ اتى وشپەي، ءالى كۇنگە دەيىن جاس جەتكىنشەكتەردىڭ كۋميرى بولىپ كەلە جاتقانى ەڭ الدىمەن، سىزدەردىڭ ارقالارىڭىز", - دەدى ەربول مىرزابوسىنوۆ.
