رەسەي پرەزيدەنتىنىڭ كومەكشىسى يۋري ۋشاكوۆ ۋاقىتشا كەلىسىمگە قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
رەسەي پرەزيدەنتىنىڭ كومەكشىسى يۋري ۋشاكوۆ 13 ناۋرىزدا ۆلاديمير ءپۋتيننىڭ اقش-تىڭ ۋكرايناداعى 30 كۇندىك ۋاقىتشا ءبىتىم تۋرالى ۇسىنىسىنا ناقتى جانە مازمۇندى باعا بەرۋى مۇمكىن ەكەنىن ايتتى. بۇل تۋرالى ول «روسسيا-1» تەلەارناسىنداعى «60 مينۋت» باعدارلاماسىندا مالىمدەدى.
ء"بىزدىڭ باستى ماقساتىمىز – ۇزاق مەرزىمدى بەيبىت رەتتەۋ. ءبىز سوعان ۇمتىلامىز. بۇل رەتتەۋ ءبىزدىڭ ەلدىڭ زاڭدى مۇددەلەرىن جانە بەلگىلى قاۋىپتەنۋلەرىمىزدى ەسكەرۋى كەرەك. ال بەيبىت پروتسەستى تەك يميتاتسيالايتىن قادامدار قازىرگى جاعدايدا ەشكىمگە قاجەت ەمەس دەپ ويلايمىن", – دەدى يۋري ۋشاكوۆ.
سكابەەۆا ۋشاكوۆتان "رەسەي بۇل ۇسىنىستى قابىلدامايدى دەگەندى بىلدىرە مە؟" دەپ سۇرادى.
الايدا پرەزيدەنت كومەكشىسى بۇل تەك ءوزىنىڭ جەكە پىكىرى ەكەنىن ايتىپ، ناقتى شەشىمدى بۇگىن وتەتىن ءباسپاسوز كونفەرەنتسياسىندا ۆلاديمير پۋتين جاريالايتىنىن جەتكىزدى.
ايتا كەتەيىك، 11 ناۋرىزدا ساۋد ارابياسىنىڭ دجيددا قالاسىندا ۋكراينا مەن اقش دەلەگاتسيالارى اراسىندا كەلىسسوزدەر ءوتتى.
ۋكراينا 30 كۇندىك ۋاقىتشا بىتىمگە كەلىسۋگە دايىن ەكەنىن ءبىلدىردى. ال اقش بۇل اقپاراتتى رەسەيگە جەتكىزىپ، بەيبىتشىلىككە قول جەتكىزۋدىڭ باستى شارتى – ەكى تاراپتىڭ ءوزارا كەلىسىمى ەكەنىن اتاپ ءوتتى.
