تاراز قالاسىنىڭ تۇرعىندارى تاراپىنان ءجيى كوتەرىلەتىن تاقىرىپتىڭ ءبىرى – جارىقتاندىرۋ ماسەلەسى. كوشەلەردىڭ بويىنا ورناتىلعان جارىقتاندىرۋ شامدارى شاھار مادەنيەتى مەن كوركىنىڭ اجىراماس بولىگى بولىپ ەسەپتەلەدى. جارىق جۇيەسى تىپتەن ءىڭىر قاراڭعىلىعى تۇسكەندە ىسكە قوسىلىپ، جولاۋشىعا جول سىلتەپ، مەكتەپتەن قايتقان وقۋشىلارعا بارار جولىن كورسەتىپ قانا قويماي، تۇنگى ۋاقىتتا ادامدار قاۋىپسىزدىگىنە دە قورعان بولادى.
وسىنى ەسكەرە وتىرىپ، 2024-2025 جىلدارى تاراز قالاسىندا ورنالاسقان 76 كوشەنى جارىقتاندىرۋ جوسپارلانعان بولاتىن. سوعان وراي مەملەكەتتىك ساتىپ الۋ كونكۋرسىنىڭ ناتيجەسىندە جەڭىمپاز كومپانيالار انىقتالىپ، بۇگىندە ءتيىستى جۇمىستار باستالدى.
اتاپ ايتقاندا، «لەنون» جشس مەردىگەرلىگىمەن الاتاۋ (ابىلسەيت ايقانوۆ) 1-بۇرىلىسى، الاتاۋ، تونكۋرش (قاسىم امانجولوۆ), مامبەت باتىر تۇيىعى، مامبەت باتىر كوشەسىنىڭ 1, 2-ءشى بۇرىلىستارى، كوكتوبە. شۋسەۆ، الاتاۋ، 2-ءشى بۇرىلىسى، جولبارىسحان، ۆولكوۆ، اينالما جول (مامبەت باتىر كوشەسىنەن اينالما جولعا دەيىن), قاجىمۇقان، اسيموۆ، كولتسەۆايا وتكەلى، الاتاۋ تۇيىعى، باربول، گيدروكومپلەكس كوشەلەرىندە جارىقتاندىرۋ جۇمىستارى قولعا الىندى.
سونداي-اق «پىراق قۇرىلىس» جشس نابەرەجنايا، ۇمبەتباەۆ، شاتتىق، نيازبەتوۆ، رەچنايا، المالى، تىلەمىس اقىن كوشەسىنەن نيازىمبەتوۆ كوشەسىنە دەيىن، ساۋىتبەك اقىن كوشەسىنەن تىلەمىس اقىن كوشەسىنە دەيىن ارالىقتا ءتيىستى جۇمىستاردى ىستەيتىن بولادى. سونداي-اق «Invest Kapital Stroy» جشس قوستاناي كوشەسى (تالدىقورعان كوشەسىنەن وتكەلگە دەيىن), تاراز، قوستاناي، 1-بۇرىلىس قوستاناي (تسەلينوگراد كوشىسىنەن تالدىقورعان كوشەسىنە دەيىن), قوستاناي تۇيىعى، قوستاناي كوشەسىنىڭ، 2, 3 بۇرىلىستارىنىڭ سامالاداي جارقىراۋىنا ۇلەس قوسپاق.
وسى رەتتە ايتا كەتەرلىگى، قارجى تەتىگى تابىلىپ جاتسا، «ورمان» القابىنداعى اقىرتاس، كوكتەرەك، اقبوتا، اياۋلى، مەنليباەۆ، اكبوزوۆ كوشەلەرى، №1 وكرۋگ بويىنشا تولە بي، ماحامبەت باتىر، كرۋپسكايا، اۆتوموبيلنىي 3-بۇرىلىسى (تاۋكە حان كوشەسىنەن تولە بي كوشەسىنە دەيىن), سۇلەيمەنوۆ كوشەسىنىڭ اياعىنان باعدارشامعا دەيىن، №3 اۋماق بويىنشا ءىت-ليتسەيگە بارار جول، اپاتاەۆ، كوشەنەي 3-بۇرىلىسى، سۋحامباەۆ، كوشەنەي، ياروشباەۆ، قاسىمبەكوۆ، راحماتي كوشەلەرى، №4 وكرۋگ بويىنشا ناۋرىزباي باتىر، اقجول، بۋرنەنسكايا، جاۋعاش باتىر، ب. مومىشۇلى، 1-بۇرىلىسى، چەرنياحوۆسكوگو، دەميسينوۆ، پريۆوكزالنايا كوشەلەرى، №9 اۋماق بويىنشا فرەسنو، 5, 8, 9, 11 بۇرىلىستارى، نەكراسوۆ، بايگازيەۆ، «بايتەرەك» ىقشاماۋدانى (13), بايزاق باتىر كوشەسىنەن «قۇمشاعال» وتكەلى جانە اشىمباەۆ كوشەسىنە دەيىن، №10 اۋماق بويىنشا ماسانچي، بايتۇرسىنوۆ، ماتروسوۆ، چكالوۆ، رايىمبەك باتىر، شاۋميانا 1, 2 بۇرىلىستارى، ۇلتانباەۆ، ابىلايحان 5-بۇرىلىسى، موڭكە بي، كۋرچاتوۆ، تاجيباەۆ، قوجابەرگەن جىراۋ كوشەلەرى دە تۇنگى جارىق شامدارىنىڭ يگىلىگىن كورمەك.
جالپى، كونە شاھاردا كوشەلەردى جارىقتاندىرۋعا ايرىقشا كوڭىل بولىنۋدە. ايتالىق، 2023 جىلى قالاداعى 83 كوشەگە تۇنگى جارىق شامدارى ورناتىلعان بولاتىن. سونىمەن قاتار جامبىل وبلىسىنىڭ اكىمى ەربول قاراشوكەەۆتىڭ تاپسىرماسىمەن ىقشاماۋدانداردىڭ كىرەبەرىس جولدارى مەن اۋلالارى دا تولىعىمەن تۇنگى جارىقپەن قامتاماسىز ەتىلىپ وتىر.
