اقتاۋلىق ەر ادام جالعىز ۇلىنىڭ ولىمىنە اق حالاتتىلاردى كىنالايدى، دەپ حابارلايدى "ادىرنا" ۇلتتىق پورتالى.
ينفورمبيۋرو مالىمەتىنشە، اتا-انا ءبىر جاسار ابدۋللاعا دارىگەرلەردىڭ ءبىر اي بويى دياگنوز قويماي، جۇمىسىنا سالعىرت قاراعانىن ايتقان. بالانىڭ دەنە قىزۋى تۇسپەي، جانساقتاۋ بولىمىنە تۇسكەن.
ەرمەك نۇرباەۆ جالعىز ۇلىنىڭ قازاسىنا اق حالاتتىلاردى كىنالايدى. سەبەبى، دەنە قىزۋى 39 گرادۋسقا كوتەرىلىپ بارعاندا دارىگەرلەر ناۋقاستى بىردەن قابىلداماعان.
ء"بىز جەدەل جاردەممەن ءۇش رەت باردىق، قاتەلەسپەسەم. ۇشەۋىندە دە قابىلدامادى. تورتىنشىسىندە بارعان كەزدە 18-ىندە ايتەۋىر قابىلدادى. اۋرۋحاناعا جاتقىزدى. 6 كۇن وتكەننەن كەيىن بالاعا پنەۆمونيا دەپ دياگنوز قويدى. بالانىڭ گەموگلابينى 70-كە ءتۇسىپ كەتكەن. بۇل تۋرالى ەمدەگەن دارىگەرى دە، باسقالارى دا حابارسىز. اشۋلانىپ، بالانىڭ دەنساۋلىعى كۇرت ناشارلاپ كەتتى دەپ سۇراعان كەزدە "ا،ا ءبىز بىلمەدىك" دەپ شىقتى. بالانىڭ جاعدايىنا ءجىتى ءمان بەرەمىز، قاداعالايمىز دەگەنى وتىرىك", – دەپ قىنجىلدى اكەسى.
قارا جامىلعان وتباسى ادىلدىكتى تالاپ ەتۋدە.
ال ماڭعىستاۋ وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى اسقار ماحمۇتوۆ ءوز ىسىنە سالعىرت قاراعان ماماندار تارتىپتىك جازاعا تارتىلدى دەپ وتىر.
"بالانىڭ سەپسيس دياگنوزىنان قايتىس بولعانى بەلگىلى بولدى. مەديتسينالىق قۇجاتتار دۇرىس تولتىرىلماعانى انىقتالدى. بۇل قابىلداۋ ءبولىمىنىڭ قىزمەتكەرلەرىنەن كەتكەن قاتەلىك. جاۋاپتىلارعا تارتىپتىك جازا تاعايىندالدى. قۇقىق قورعاۋ ورگاندارىنا بۇكىل قۇجات جىبەرىلدى", – دەدى باسقارما باسشىسى.
پد "مەديتسينا قىزمەتكەرىنىڭ كاسىپتىك مىندەتتەرىن تيىسىنشە ورىنداماۋ" بابى بويىنشا تەرگەۋ جۇرگىزىپ جاتقانىن حابارلادى.
