امەريكاندىق ونەرتاپقىش. «The Gillette Company» كورپوراتسياسىنىڭ العاشقى قوجايىنى. جەر شارى حالقىن قاۋىپسىز، قولايلى ۇستارامەن قامتاماسىز ەتە وتىرىپ، ءوزى مول تابىسقا كەنەلگەن كاسىپكەر. 46 جاسىندا كاسىپورىن اشىپ، 49 جاسىندا ميلليونەر بولعان ازامات.
كينگ كەمپ جيللەتت 1855 جىلى 5-قاڭتاردا ۆيسكونسين شتاتىنداعى فون-ديۋ-لاك قالاشىعىنداعى شۆەد وتباسىندا دۇنيەگە كەلەدى. كينگ 4 جاسقا تولعاندا ولاردىڭ وتباسى ۇلكەن قالادان ۇلكەن مۇمكىندىك ىزدەپ، چيكاگوعا كوشىپ كەلەدى.
اتا-اناسى ون ساۋساعىنان ونەر تامعان شەبەر، ىسكەر جاندار ەدى. اكەسى دجوردج جيللەتت قولىنا تۇسكەن زاتتى جونىپ جەتىلدىرىپ ۇيرەنگەندىكتەن، تەمىردەن جاسالعان بۇيىمدار ساتاتىن دۇكەننىڭ يەسى بولدى. تاعامنىڭ ءتۇر-ءتۇرىن دايىندايتىن اناسى لەميرا كەمپ جيللەتتىڭ رەتسەپتىسى قازىرگى زامانعا دەيىن اقش اسحانالارىندا قولدانىلىپ ءجۇر.
جاڭا قونىستاعى شارۋالارى دوڭگەلەگەنمەن، 1871 جىلى چيكاگو قالاسىندا تاريحتا اتى قالعان ايگىلى ءورت بولىپ، اكەسىنىڭ دۇكەنى ورتەنىپ كەتەدى. دۇكەننىڭ كۇلگە اينالۋى جانۇيانىڭ تۇرمىسىنا اۋىر تيەدى.
كوپ ۇزاماي دجوردج مىرزا پاتەنت ورتالىعىنا قىزمەتكە الىنادى، 17 جاسار كينگ جەرگىلىكتى كاسىپورىنداردىڭ بىرىنە كومميۆوياجەر (فيرمانىڭ ساۋدا وكىلى) بولىپ جۇمىسقا تۇرادى. لەميرا حانىمنىڭ «اق ءۇيدىڭ اسپاز كىتابى» اتتى ەڭبەگى جارىق كورىپ، كىتاپتىڭ مول ساتىلىمى وتباسىنىڭ تۇرمىسىن قايتا تۇزەيدى. وسى كەزدەن باستاپ كينگ كەمپ جيللەتتىڭ الداعى وتىز جىلى كومميۆوياجەر قىزمەتىندە وتەدى. ءتىس شۇقىعىشتان سابىنعا دەيىنگى شارۋاشىلىق بۇيىمدارىنىڭ ءبارىن ساتۋمەن اينالىسقان كينگ تەك اقش-تىڭ تۇكپىر-تۇكپىرىن عانا ەمەس، ەۋروپانىڭ ءبىراز ەلدەرىن دە ارالاپ، ىسىلعان، ينەنىڭ كوزىنەن وتەتىن مامان بولىپ ءپىسىپ جەتىلەدى.
ومىردەگى جەكە جەتىستىكتەرىنە كوڭىلى تولماعان كينگ كەمپ جيللەتت وندىرىستىك-عىلىمي جاڭالىقتار اشىپ، بىرنەشە پاتەنت يەلەندى. پورشەن ىسپەتتى سۋ قۇبىرىنىڭ شۇمەگىن بىتەيتىن تىعىن، رەزەڭكەدەن جاسالعان ۆەنتيل، ەكى ەلەكتر وتكىزگىشىن ويلاپ تاپقانىمەن، ول جاڭالىقتار جيللەتتىڭ قولىن قىرۋار اقشاعا دا، بيىك ابىرويعا دا جەتكىزبەدى. ول 1891 جىلى جۇمىسىن شتوپور مەن بوتەلكە تىعىنىن وندىرەتىن «Baltimore Seal Company» فيرماسىنا اۋىستىرادى. فيرما قوجايىنى ۋيليام پوينتەر جاڭا قىزمەتكەردىڭ ەڭبەكقورلىعىن، ىزدەنىسىن، تاپقىرلىعىن جوعارى باعالادى. قوعامعا اسا قاجەتتى دۇنيەنى ومىرگە اكەلۋگە قۇمار كينگ جيللەتتكە جاڭا جۇمىس ورنىنىڭ تىنىس-تىرشىلىگى كوپ وي سالدى. مىنا كاسىپورىن ءبىر رەت عانا قولدانىلاتىن تىعىن ءوندىرىپ جاتىر! بوتەلكەگە كيگىزىلگەن تىعىن بوتەلكە اشىلعان سوڭ جارامسىز بولىپ، قوقىسقا لاقتىرىلادى. بىراق سوندا دا تىعىنسىز بوتەلكەنىڭ دە، مىنا فيرمانىڭ دا اجارى كىرمەيدى. تىعىن ءبىر ساتتىك بۇيىم بولسا دا كومپانيا مەن تۇرمىستىڭ اجىراماس بولىگىنە اينالعان. ەلدىڭ قولايىنا جاعۋ ءۇشىن ماڭگىلىك گەنەراتور ويلاپ تابام دەپ تىراشتانۋدىڭ قاجەتى جوق ەكەن. ءبىر مارتە بولسا دا ادامعا ابىرويلى قىزمەت كورسەتىپ وتەتىن تاۋار تاۋىپ شىعارساق جەتكىلىكتى! وسى وي ونىڭ باسىندا 1895 جىلعا دەيىن قايناپ ءجۇردى.
1895 جىلى تاڭەرتەڭ اينانىڭ الدىنا كەلگەن كينگ جيللەتت كۇندەلىكتى پايدالانىپ جۇرگەن ۇستاراسىنىڭ ءجۇزى مۇقالعانىن بايقايدى. كينگ قولىنداعى ۇستاراسىنا باجايلاپ قاراپ، وعان ومىرىندە ءبىرىنشى رەت شىن ىقىلاسپەن نازارىن اۋدارادى. جالعىز ءجۇزدى وتكىر پىشاعىنىڭ ءتۇبى ساپقا بەكىتىلىپتى. ۇستارانىڭ قىمبات سابى ادەمى ورنەكتەرمەن، مايدا اشەكەي تاستارمەن بەزەندىرىلگەن دەمەسەڭ ەجەلگى مىسىردا قولدانىلعان كونە ۇستارالاردىڭ فورماسىنان ەش ايىرماشىلىعى جوق. ءجۇزى مۇقالعان سايىن جوندەۋ ورتالىقتارىنداعى شارىقشىلارعا اپارىپ، اقشا تولەپ قايراتىپ جۇرگەنىڭ... ەبەدەيسىز ۇستارامەن قىرىنام دەپ بەتىن ءتىلىپ الىپ جۇرگەندەر قانشاما... «مەن ءبىر سەكۋندتا وزىمە قويىلعان ونشاقتى سۇراقتىڭ بارلىعىنا سول ساتتە بىردەن جاۋاپ تاۋىپ ۇلگەردىم، – دەپ ەسكە الادى كەيىننەن كينگ كەمپ جيللەتت، – مەنىڭ كوز الدىما بولاشاق ۇستارانىڭ سۇلباسى ەلەستەي باستادى. بۇل راتسيونالدى ويلاۋدان ەمەس، قۇشتارلىقتان تۋعان جاڭالىق ەدى».
جيللەتت كوپ ويعا بەرىلمەستەن قيالىنداعى جوسپارىن دەرەۋ ىسكە اسىرۋعا كىرىستى. الدىن الا سىزىلعان سىزبانىڭ جەلىسى بويىنشا ەكى جيەگى قايرالعان جۇقا بولات تاسپانىڭ كەسىندىسىن (لەزۆىسى) قوس پلاستيكتىڭ ورتاسىنا سالىپ جابىستىرا قىستىرادى. كەلەسى كەزەكتە بۇل ءۇش بولشەك سۇق ساۋساقتىڭ كولەمىندەي كىشكەنتاي تۇتقاعا بەكىتىلەدى. ناتيجەسىندە ت ءارپى پىشىندەس ۇستارا دۇنيەگە كەلدى. ەندى ۇستارانىڭ لەزۆىسى مۇقالسا، كىرلەسە ونى قايراماي-اق، تازالايماي-اق الىپ تاستاپ، باسقاسىن اۋىستىرا سالۋعا بولادى. كينگ جيللەتت جاڭا تۋىندىسىن كورگەندە ارقاسىنان جۇك تۇسكەندەي «ۋھ» دەپ ءبىر دەم الدى. الايدا جۇمىسى ويداعىداي تولىق ورىندالماپتى. لەزۆىنى دايىنداۋ قيىننىڭ قيىنى ەكەن. لەزۆى ۇستارانىڭ المالى-سالمالى ۇساق بولشەگى بولعاندىقتان، ونىڭ وزىندىك قۇنى تومەن، باعاسى ارزان بولۋ كەرەك. جۇقا، نازىك، بەرىك، سونىمەن قاتار قۇنى ارزان بولات تەمىرگە قاجەتتىلىك تۋدى. ءوز ۇيىندە كۇنى-ءتۇنى تاجىريبە جۇرگىزىپ، 25 مىڭ دوللارىن ىزدەنىسكە شىعىندايدى. دالدىكپەن جاسالىنباعان ەڭبەك جەمىسىن بەرمەدى.
كينگ جيللەتت تەحنيكا سالاسىنىڭ مامانى بولماعاندىقتان، سول سالادا جۇرگەندەردىڭ اقىل-كەڭەسىنە جۇگىنۋگە ءماجبۇر بولدى. ول ەسىگىن قاققان تەحنيكالىق ماماندار مۇنداي جۇپ-جۇقا بولات تەمىر وسى ۋاقىتقا دەيىن وندىرىلمەگەنىن، وندايدى دايىنداۋ مۇمكىن ەمەستىگىن دە ايتىپ، وعان بۇل جۇمىستى تاستاۋعا كەڭەس بەرەدى. ەگەر كينگ كەمپ جيللەتت تەحنيكالىق ماماندىقتىڭ يەسى بولعاندا، باستاعان شارۋاسىن اياقسىز قالدىرىپ كەتەر ەدى، بىراق ول بۇل ىسكە ءاۋ باستا راتسيونالدى ويلاۋمەن ەمەس، يدەيالىق شابىتپەن كەلگەن ەدى. سوندىقتان ۇستاراسىنىڭ سىزباسى سىزىلعان قاعازدارى مەن ۇستاراسىنىڭ قولدان قۇراستىرعان ۇلگىسىن ارقالاپ، ىزدەنىسىن جالعاستىرا بەردى.
تالاي عىلىمي ينستيتۋتتار مەن ءوندىرىس وشاقتارىنىڭ تابالدىرىعىن توزدىرىپ، قولداۋشى تاپپاعان كينگ جەرگىلىكتى اقىلى زەرتتەۋ ينستيتۋتتارىنىڭ بىرىنە بارىپ، ۇستاراعا لەزۆى بولۋعا جارايتىن نازىك بولات تەمىرگە لابوراتوريالىق تەست جۇرگىزۋدى سۇرايدى. ونداعىلار تەستتىڭ اقىسى رەتىندە 250 مىڭ دوللار تالاپ ەتكەندە جيللەتتىڭ كوڭىلى سۋ سەپكەندەي باسىلادى. بوستون مەن نيۋ-يوركتەگى ارنايى دۇكەندەر مەن مەتالل شارىقتايتىن جوندەۋ ورتالىقتارى دا ءۇمىتتى اقتامادى. ونىڭ نازىك بولات تەمىردى قالاي بەرىك ەتۋگە بولادى، بولات تەمىر قانداي تەمپەراتۋرادا شىڭدالادى، لەزۆى مايىرىلىپ قالماس ءۇشىن قانداي شارالاردى قولعا الۋ كەرەك دەگەن ساۋالدارى جاۋاپسىز قالدى. ماسساچۋسەتس تەحنولوگيالىق ينستيتۋتىنا بارعاندا ونداعى ساراپشىلار كينگ جيللەتتىڭ سۇراعىنا ءۇنسىز عانا باستارىن شايقاپ يشارا جاسادى.
6 جىلعا سوزىلعان ساندالىستان سوڭ، وعان ۋيليام نيكەرسون ەسىمدى جاس حيميك كەزىگەدى. العاشقىدا نيكەرسون نەمقۇرايلىلىق تانىتقانىمەن، بىرلەسىپ جاساعان بىرنەشە تاجىريبەدەن سوڭ، ونىڭ قىزىعۋشىلىعى ويانادى. نە كەرەك، وسى كۇنى ءار تالى ەكى قابات قاعازعا ورالىپ، ون تالى كىپ-كىشكەنتاي قوراپقا سىيىپ كەتىپ، دۇكەندەردە ساتىلىپ جاتقان وتكىر لەزۆىنىڭ العاشقى ۇلگىسى ەكى ايدىڭ ىشىندە دايىندالىپ شىعارىلادى. بۇل 1901 جىل ەدى. پاتەنتكە قول جەتكىزگەن سوڭ، سول جىلى 28-قىركۇيەكتە «American Safety Razor Company» كاسىپورنىن تىركەۋدەن وتكىزىپ، وندىرىسكە قارجى قۇياتىن ينۆەستور ىزدەۋگە كوشەدى. ويتكەنى ەكەۋى دە اقشاسىز بولاتىن. 1902 جىلى كومپانيا اتى «Gillette Safety Razor Company» بولىپ وزگەرەدى. ساۋدا وكىلى رەتىندە 30 جىلدىق جۇمىس تاجىريبەسى بار كينگ جيللەتت بىرنەشە ينۆەستورلاردان ازىن-اۋلاق ينۆەستيتسيا الىپ سالعانىمەن، ونىسى تەز تۇگەسىلەدى. وعان كومپانياسىنىڭ 40% اكتسياسىن ساتىپ، ينۆەستيتسيا تارتۋعا تۋرا كەلدى. اكتسيا ساتۋدان تۇسكەن اقشا 5000 دوللاردى عانا قۇراعاندىقتان، كينگ جيللەتت جەرگىلىكتى ءىرى سىرا زاۋىتىنىڭ ديرەكتورى دجون دجويستى 60 000 دوللار ينۆەستيتسيا قۇيۋعا كوندىرەدى.
«Gillette» دەپ ات بەرىلگەن ۇستارالار 1903 جىلدان باستاپ 5 دوللارلىق باعامەن نارىققا جول تارتتى. ول زاماندا امەريكاندىقتاردىڭ ورتاشا جالاقىسى 60 دوللارعا تەڭ ەدى. ۇستارا مەن لەزۆى سالىنعان قوراپتىڭ سىرتىنا كينگ كەمپ جيللەتتىڭ سۋرەتى باسىلادى. ۇستارا مەن لەزۆىلەر وتە كوپ مولشەردە شىعارىلعانىمەن، جارناما جۇمىستارى ناشار جۇرگىزىلگەندىكتەن، سول جىلى بار-جوعى 51 ۇستارا مەن 168 لەزۆى عانا ساتىلادى. ينۆەستورلار اراسىندا دەگبىرسىزدىك تۋدى. ال كينگتىڭ ءوزى تۇرمىسى قيىنداعاندىقتان، باياعى فيرماسىنا ساۋدا وكىلى بولىپ بارىپ، ەسكى جۇمىسىنا قايتا جەگىلەدى.
ىسساپارمەن انگلياعا اتتانار الدىندا ول جەكە كومپانياسىنىڭ تاعدىرىن شەشەتىن ءبىر كەلەلى ءىستى تىندىرادى: قويمادا ساتىلماي قالعان ۇستارالار مەن لەزۆىلەردىڭ جارتىسىن تۇرعىندارعا تەگىن تاراتىپ تاستايدى. كەيىن انگليادان ورالعاندا جوڭكىلىپ ۇستارا مەن لەزۆى ىزدەپ جۇرگەن تۇتىنۋشىلاردى كورەدى. سويتسە تەگىن ۇلەستىرىلگەن تاۋارلاردى پايدالانىپ كورگەننەن سوڭ، حالىقتىڭ بۇعان دەيىن بەيتانىس بولىپ كەلگەن ۇستاراعا دەگەن كوزقاراسى كۇرت جاقسارىپتى. جاڭا ءونىمدى ەلدەن ەل ەستىپ، جيللەتتىڭ قىسىلتاياڭ شاقتا جاساعان جومارتتىعى وزىنە دە، باسقاعا دا يگىلىگىن سىيلادى. «Gillette Safety Razor Company» كاسىپورنى 1904 جىلى 90 000 ۇستارا جانە 123 000 لەزۆى ساتىپ وتكىزەدى. كومپانيانىڭ ساتۋ كولەمى 13 ميلليون دوللارعا جۋىقتايدى. اينالدىرعان ءۇش جىلدىڭ ىشىندە ميلليونەر بولىپ شىعا كەلگەن كينگ كەمپ جيللەتت ماركەتينگتىك ساياساتقا باسا كوڭىل ءبولدى. ماسەلەن، ۇستارالاردى تەگىن تاراتىپ، لەزۆىنى وتە مول كوپ قىلىپ وندىرەدى. قولدارىنا تەگىن ۇستارا تيگەن تۇتىنۋشىلار ونى پايدالانۋ ءۇشىن دۇكەندەردەگى لەزۆىلەردى جاپپاي ساتىپ الىپ جاتتى.
كوممەرتسيالىق ماماندار «ىلمەك پەن جەم» (قارماقتىڭ ۇشىنا قاتىستى ايتىلعان) دەپ ات قويعان بۇل ماركەتينگتىك ءادىس-ءتاسىل بۇگىنگى كۇنى ءجيى قولدانىلادى. «Sony» كورپوراتسياسى «Play Station» ويىن باعدارلامالارىن وزىندىك قۇنىنان تومەن باعادا ساتقانىمەن، ويىنعا ليتسەنزيا ساتۋ ارقىلى شىعىندى ارتىعىمەن وتەپ الادى. پرينتەر مەن كوشىرمە ماشينالارىن ءوندىرۋشى كورپوراتسيالاردىڭ تابىسىنىڭ نەگىزگى بولىگى كارتريدج بەن بوياۋ ساتۋدان ءتۇسىپ وتىرعانى بەلگىلى. ءبىر رەت عانا پايدالانىلاتىن نەگىزگى تاۋاردى تەگىن نەمەسە وتە ارزان باعاعا وتكىزۋ ارقىلى كوپ رەت قولدانىلاتىن قوسىمشا تاۋاردى قىمباتىراق ەتىپ مولىنان نارىققا شىعارۋ كينگ جيللەتتەن قالعان ءداستۇر بولاتىن. كينگ مىرزانىڭ ءوزى ايتپاقشى «رىنوكتى ساتىپ الۋعا اقشانى اياماۋ كەرەك». سونىمەن بىرگە ول پاتەنتىنىڭ مەرزىمىن تاعى 17 جىلعا سوزدىرادى. ۇستارا نارىعىنا تولىق مونوپوليا ورناتىپ، پاتەنتىن رۇقساتسىز پايدالانعانداردى زاڭمەن قۋدالايدى. جيللەتتىڭ كومپانياسى 1906 جىلى گەرمانيا ارقىلى ەۋروپا رىنوگىنا جول اشادى.
ءبىرىنشى دۇنيەجۇزىلىك سوعىس تۇسىندا كينگ جيللەتتىڭ كومپانياسىنىڭ جۇمىسى جانداندى. 1914 جىلى اقش قارۋلى كۇشتەرىنىڭ باس شتابىمەن ارنايى كوممەرتسيالىق كەلىسىمشارت جاساپ، جىل سايىن 1 ميلليون ۇستارا مەن 32 ميلليون لەزۆىنى مايدانعا جونەلتىپ وتىردى. 1917 جىلى بۇل كورسەتكىش ەسەلەپ ءوسىپ، 3,5 ميلليون ۇستارا مەن 120 ميلليون لەزۆىگە ۇلعايدى. سوعىس اياقتالعان سوڭ ەلگە ورالعان جاۋىنگەرلەر «Gillette» ۇستاراسىن ەرجۇرەك ازاماتتىڭ گيگيەنالىق اسپابى رەتىندە باعالاپ، كومپانيانىڭ ۇستارالارىنا قۇرمەتپەن قاراپ ءجۇردى.
و باستا پاتەنت بيۋروسىمەن جاسالعان كەلىسىم بويىنشا 1921 جىلى كينگ كەمپ جيللەتتىڭ پاتەنتىنىڭ 20 جىلعا بەلگىلەنگەن مەرزىمى اياقتالاتىن ەدى. ونىڭ پاتەنتىنىڭ مەرزىمى اياقتالعان كۇننىڭ ەرتەسىندە، باسقا باسەكەلەستەرى جيللەتتىڭ ۇستاراسى مەن لەزۆىسىن ءوندىرىپ، نارىققا ساتۋعا قۇقىلى بولدى. ول مەرزىمنىڭ اياقتالۋىنا التى اي قالعاندا ۇستارانىڭ جاڭا ۇلگىسىن دايىنداپ، ونىن باعاسىن 1 دوللار ەتىپ بەلگىلەپ (بۇرىنعى ۇلگىدەگى ۇستارانىڭ باعاسى 5 دوللار بولاتىن), نارىققا تاراتىپ تاستايدى. جاڭا ءارى ارزان ۇستارامەن قاۋىشقان تۇتىنۋشىلار كينگ جيللەتتىڭ كومپانياسىنا رەكوردتىق پايدا ءتۇسىردى. پاتەنت مەزگىلىنىڭ تۇگەسىلۋىن اسىعا كۇتكەن باسەكەلەستەر جيللەتتىكىنەن ارزان ۇستارا شىعارا المايتىنىن سەزىپ، ونىمەن جارىسقا تۇسۋگە جۇرەكسىندى. برەندكە اينالىپ ۇلگەرگەن كينگ جيللەتت باعا بەلگىلەۋدى دە ءوز پايداسىنا شەشىپ، ىرىقتاندىرىپ الدى.
كينگ كەمپ جيللەتتىڭ كاسىپكەرلىكتەن بولەك تاعى ءبىر قىرى بولدى. ول ادامزات قوعامىن گۇلدەندىرۋدى قيالدادى. وسى تاقىرىپتا 1894 جىلى «ادامزات تەندەنتسياسى» دەپ اتالاتىن كىتاپ جازادى (ول بۇدان باسقا تاعى ەكى كىتاپتىڭ اۆتورى). امەريكا كوشەلەرىندەگى ىعى-جىعى حالىقتان، بەي-بەرەكەت جۇرگەن كولىكتەردەن، قالا ىشىندەگى قيقى-جيقى سالىنعان ءوندىرىس وشاقتارىنان، ەكولوگيالىق لاس ورتالاردان شارشاعان كينگ مىرزا كىتابىندا الەمدى باسقارۋدىڭ جاڭا جۇيەسىن ۇسىنادى. ونىڭ ويىنشا امەريكا حالقى ۇلى وزەندەر ماڭايىندا سالىنعان ءىرى قالالار كەشەنىندە – مەتروپوليستە ءومىر ءسۇرۋى كەرەك. ميلليونداعان تۇرعىندارعا ارناپ كوپ قاباتتى ۇيلەر سالىنادى جانە ول ۇيلەر نياگارا سارقىراماسىنان وندىرىلگەن ەنەرگيامەن قامتاماسىز ەتىلمەك. قورشاعان ورتانى لاستاۋشىلار زاڭ جۇزىندە جازالانىپ، ال الەۋمەتتىك ساياسات اكتسيونەرلىك قوعام تۇرىندە جۇرگىزىلەدى. قوعامنىڭ مۇشەلەرى ءبىر-بىرىمەن باسەكەگە تۇسپەي، تەڭدەي ديۆيدەنت الىپ وتىرادى. ءبىر سوزبەن ايتقاندا، كينگ كەمپ جيللەتت ۋتوپيالىق-ۋربانيزاتسيالىق سوتسياليزمگە شالدىققان ادام بولدى. ول ارمانىنداعى مەتروپوليستى اريزونا شتاتىنا ورناتۋعا نيەتتەندى. ول 1910 جىلى امەريكا پرەزيدەنتى تەودور رۋزۆەلتكە 1 ميلليون دوللارلىق ايلىق ۇسىنىپ، ونى اريزونا شتاتىندا تۇرعىزىلاتىن مەتروپوليسكە پرەزيدەنت بولۋعا شاقىرادى. تەودور رۋزۆەلتتىڭ وعان بەرگەن جاۋابى ءالى كۇنگە دەيىن تاريحتا ايتىلعان تاپقىر ءسوز بولىپ ەسەپتەلەدى: «ۇسىنىسىڭىزعا قارسى ەمەسپىن، بىراق مەن جۇرتقا ۇستارا ساتىپ، ءوزى مۇرتىن المايتىن ادامداردىڭ سوزىنە سەنىڭكىرەي بەرمەيمىن» دەپ ءسوزدىڭ اياعىن قالجىڭعا اينالدىرىپ جىبەرىپتى. ودان سوڭ ەكس-پرەزيدەنت ۋيليام تافتقا قولقا سالادى. بىراق ول دا ۇسىنىستان باس تارتادى. اۆتوموبيل ماگناتى گەنري فوردقا ۇسىنىسىن جەتكىزگەندە، سۇحباتتىڭ ارتى كيكىلجىڭگە ۇلاسىپ، ەكى بيزنەسمەن رەنجىسىپ تارقايدى.
كينگ جيللەتت بالا كۇنىندە بويىنا سىڭگەن ادامگەرشىلىگىن قارتايعانشا جوعالتپادى. ءومىرىنىڭ سوڭىنا دەيىن سۇيگەن جارىنا ادال بولىپ ءوتتى. جالعىز بالاسىن كومپانيانىڭ ديرەكتورلار كەڭەسىنىڭ مۇشەسى ەتىپ بەكىتەدى. ات جارىسى، ياحتا سايىسى سەكىلدى ويىن تۇرلەرىنە دە قىزىعۋشىلىعى بولمادى. ىشىمدىك ءىشىپ، قىز-قىرقىن قۋاتىن ادەتتەن اۋلاق ءجۇردى. الەم ەلدەرىنە ساياحاتتاۋ ونىڭ سۇيىكتى ءىسى بولدى. كورپوراتسيانىڭ 25 جىلدىق مەرەكەسىندە «نورۆەگيانىڭ سولتۇستىگىنەن ساحاراعا دەيىنگى اۋماقتا «Gillette» ۇستاراسىنىڭ ءجيى كەزدەسەتىنىن» ايتىپ اعىنان جارىلادى. شىنىندا دا، كينگ مىرزانىڭ سۋرەتى باسىلعان ۇستارا قوراپتارى ونىڭ ءتىرى كۇنىندە-اق انتاركتيدادان باسقا قۇرلىقتاردىڭ بارىنە تاراعان. ول اريزونا شتاتىنان مەتروپوليس تۇرعىزام دەپ قۇلشىنىپ جۇرگەن تۇستا، ونىڭ جەكە بايلىعى 200 ميلليون دوللارعا جەتكەن ەدى. قولىنداعى قارجىنىڭ ءبىرازىن كورپوراتسيا اكتسيالارىن ينۆەستورلارعا ساتۋدان ءتۇسىردى. كومپانياداعى ۇلەسىنىڭ ازايۋىنا بايلانىستى باسشىلىق قۇرامنان دا بىرتىندەپ شەتتەتىلەدى. ايتكەنمەن، فورمالدى تۇردە كورپوراتسيانىڭ قوجايىنى بولىپ سانالدى.
اقش باسشىلىعى مەن ارىپتەستەرىن جاڭاشا تىرشىلىك فورماسىن قۇرۋعا يلاندىرا الماعان كينگ جيللەتت ەندى ول يدەيانى ءوزىنىڭ جەكە ومىرىندە ىسكە اسىرۋعا بەل بايلايدى. كاليفورنيا شتاتىنان اپەلسين القابىن ساتىپ الىپ، ارنايى ساۋلەتشى جالداپ، ول جەرگە ءزاۋلىم ءۇي مەن ساياباق تۇرعىزادى.
ونىڭ ءومىرىنىڭ سوڭعى كەزەڭى ۇلى دەپرەسسيا جىلدارىمەن تۇسپا-تۇس كەلەدى. كينگ كەمپ جيللەتتىڭ جوقتىعىن پايدالانىپ، ديرەكتورلار كەڭەسى مەن مەنەدجەرلەر قۇيتۇرقى ساياسات ۇيىمداستىرىپ، ونى كومپانياداعى قالعان اكتسيالارىنان ايىرادى. قولىنداعى قاراجاتىن جىلجىمايتىن مۇلىك نارىعىنا ءساتسىز قۇيىپ، قارجىسى ەكونوميكالىق داعدارىس جىلدارىندا تۇگەل كۇيىپ كەتەدى. كينگ جيللەتت مىرزا 1932 جىلى 9-شىلدەدە اپەلسين القابىنداعى ۇيىندە 77 جاسقا جەتىپ قايتىس بولادى.
ءتۇيىن
ەگەر ءجۇز جىل بۇرىن شىعارىلعان اۆتوموبيل مەن وسى كۇنى شىعارىلعان ءاۆتوموبيلدى جانە العاشقى تەلەفون ۇلگىسى مەن قازىر قولدانىستا جۇرگەن تەلەفوندى قاتار قويىپ سالىستىرار بولساڭىز، ايىرماشىلىق جەر مەن كوكتەي. ال ءپىشىنى ت ارپىنە ۇقساس ۇستارالاردىڭ العاشقى نۇسقاسى مەن سوڭعى نۇسقاسىن سالىستىرساق كوپ وزگەشەلىك تابا المايمىز. كومپيۋتەريزاتسيا مەن ەلەكترونيكا دامىپ، قىرىنۋ قۇرالدارى جان-جاقتى جەتىلدىرىلسە دە، توكپەن جۇمىس ىستەيتىن ۇستارالار كوپتەپ شىقسا دا، ولار كينگ كەمپ جيللەتت ۇسىنعان ۇلگىدەگى ۇستارالاردى نارىقتان ءالى ىعىستىرا الماي وتىر.
اسىل اباي
"ادىرنا" ۇلتتىق پورتالى
