استانادا 14 قىركۇيەك كۇنى جەڭىل كولىك جول جوندەپ جاتقان جۇمىسشىلاردىڭ ءبىرىن قاعىپ، مەرت ەتتى، دەپ حابارلايدى “ادىرنا” ۇلتتىق پورتالى Zakon.kz-كە سىلتەمە جاساپ.
ەلوردالىق پوليتسيا دەپارتامەنتىنىڭ مالىمەتىنشە، وقىس وقيعا Lada ماركالى اۆتوكولىكتىڭ جۇرگىزۋشىسى ءوندىرىس كوشەسىنىڭ بويىمەن اقبيداي كوشەسىنە قاراي كەلە جاتقاندا بولعان.
"ەر ادامدى قاعىپ كەتكەننەن كەيىن، Lada جولدىڭ قارسى بەتىنە شىعىپ KIA Sportage كولىگىمەن سوقتىعىسقان. جول اپاتى سالدارىنان جۇمىسشى العان جاراقاتتارىنان وقيعا ورنىندا جان تاپسىردى. Kia Sportage-ءنىڭ جۇرگىزۋشىسى مەن جولاۋشىلارى اۋرۋحاناعا جەتكىزىلدى. مەديتسينالىق تەكسەرۋدەن كەيىن ولار ۇيىنە بوساتىلدى", - دەدى ۆەدومستۆونىڭ ءباسپاسوز قىزمەتى.
اتالعان فاكتى بويىنشا قىلمىستىق ءىس قوزعالدى، ال جۇرگىزۋشى استانا قالالىق پد-نىڭ تەرگەۋ يزولياتورىنا توعىتىلدى. تەرگەۋ امالدارى ءجۇرىپ جاتىر.
