كوشپەندىلەر ويىندارى اياسىندا «قۇسبەگىلىك» سپورت ءتۇرى بويىنشا ەكى كۇن قاتارىنان وتكەن جارىس ءوز مارەسىنە جەتتى. تارتىستى دودانىڭ قورىتىندىسى بويىنشا ۇلتتىق قۇراما سپورتشىلارى 2 التىن، 1 كۇمىس، 3 قولا مەدالدى قانجىعالارىنا بايلادى.
«بۇركىت سالۋ» ساناتىندا ءبىرىنشى ورىندى ۇلتتىق قۇراما مۇشەسى سەرىكبەك كۇنتۋعان «العىر» قۇسىمەن يەلەندى. 2 جاتتىعۋ بويىنشا وتكەن تارتىستى باسەكەدە ەكىنشى ورىنعا «زاڭعار» قۇسىمەن ەرزات بايقاداموۆ شىقسا، «قولا» مەدالدى قۇسبەگى ارمان قوشقاروۆ «نارىن» اتتى بۇركىتىمەن ەنشىلەدى.
«قارشىعا سالۋ» ساناتى بويىنشا ءبىرىنشى ورىندى «نايزاتۇياق» قۇسىمەن استانالىق قۇدايبەرگەن راۋيلۇلى جەڭىپ السا، ەكىنشى ورىنعا قىرعىزستان سپورتشىسى – اديلبەك قۇدايبەرديەۆ «قارامونشاق» قۇسىمەن جايعاستى. ال ۇلتتىق قۇرامامىزدىڭ تاعى ءبىر سپورتشىسى – باعدات كەۋەنوۆ «سومبالاق» قارشىعاسىمەن قولا مەدالدى قانجىعاسىنا بايلادى.
«يتەلگى سالۋ» بويىنشا «التىن» جانە «كۇمىس» مەدال جۇلدەگەرلەرى – باكىت شامۋراتۋلى جانە تۇگەلباي ابدىكادىروۆ (قىرعىزستان), «قولا» مەدال – ۇلتتىق قۇراما مۇشەسى باقداۋلەت باباجاننىڭ ەنشىسىندە.
ۇلتتىق سپورت ءتۇرىن قولداۋ جانە ناسيحاتتاۋ ماقساتىندا ءدۇبىرلى دودادا قۇسبەگىلىكتەن قازاقستان قورجىنىنا مەدال سالعان ۇلتتىق قۇراما مۇشەلەرىنە فەدەراتسيا پرەزيدەنتى بەرىك ۋاليدەن ارنايى سىيلىقتار قاراستىرىلعان بولاتىن.
TAS Group كومپانياسى مەن ونىڭ باسشىسى دۋلات تاستەكەەۆتىڭ قولداۋىمەن سپورتشىلار اقشالاي سىيلىقتارمەن ماراپاتتالدى. ءۇشىنشى ورىن ءۇشىن ارمان قوشقاروۆ، باعدات كەۋەنوۆ جانە باقداۋلەت باباجانعا 300 مىڭ تەڭگەدەن، ەكىنشى ورىن ءۇشىن ەرزات بايقاداموۆقا 500 مىڭ تەڭگە سىياقى بەرىلدى. ال «قارشىعا سالۋ» ساناتى بويىنشا ءبىرىنشى ورىن يەلەنگەن قۇدايبەرگەن راۋيلۇلىنا 1 ملن تەڭگە تابىستالدى.
Q4 Tulpar Auto كومپانياسىنىڭ باسشىسى تالعات ساكانوۆتىڭ قولداۋىمەن فەدەراتسيا «بۇركىت سالۋ» ساناتىندا جەڭىمپاز اتانعان سەرىكبەك كۇنتۋعانعا اۆتوكولىك كىلتىن سىيعا تارتتى. سونداي-اق كومپانيا باسشىسى «بۇركىت سالۋدان» ەكىنشى ورىن العان جەرلەسى ەرزات بايقاداموۆقا دا ءوزىنىڭ اتىنان تەمىر تۇلپار تابىستادى.
بۇدان بولەك، V دۇنيەجۇزىلىك كوشپەندىلەر ويىندارى ديرەكتسياسىنىڭ اتىنان جەكە سپورت تۇرلەرىندە جەڭىمپازدارعا – ءبىرىنشى ورىن ءۇشىن 500 مىڭ تەڭگە، ەكىنشى ورىن يەلەنگەندەر – 300 مىڭ تەڭگە، قولا جۇلدەگەر – 200 مىڭ تەڭگەگە ارنايى سەرتيفيكاتتار تابىستالدى.
