"ادىرنا" ۇلتتىق پورتالىندا “ساراندىقتار جاڭا جىلدىق شىرشاعا 29 464 285 تەڭگە قارجى ءبولدى” دەگەن تاقىرىپپەن سىني ماقالا جارىق كورگەن ەدى. سول ماتەريالعا قاتىستى قاراعاندى وبلىسىنىڭ ىشكى ساياسات باسقارماسى جاۋاپ بەردى، دەپ حابارلايدى "ادىرنا" ۇلتتىق پورتالى.
اتالعان ماقالادا قاراعاندى وبلىسىنا قاراستى ساران قالاسى اكىمدىگىنىڭ مەملەكەتتىك اكتيۆتەر جانە ساتىپ الۋ ءبولىمى التى اي بۇرىن بيىكتىگى 12 مەترلىك جاڭا جىلدىق شىرشانى ورناتۋعا 29 464 285 تەڭگە قارجى بولگەنىن، سونىمەن قاتار، تەندەر جەڭىمپازى وسى قارجىعا سۇڭقار ستاديونىنىڭ الاڭىنا جاڭا جىل تاقىرىبىنا ارنالعان فوتوايماقتى دايىنداپ، ءتۇرلى جارىقتاردى، بويى 5 مەتر بولاتىن اياز اتا مەن اقشاھار قويۋى كەرەكتىگىن تارقاتىپ جازعانبىز!
ساراندىقتاردىڭ شىلىڭگىر شىلدەدە جاڭا جىلدى مەرەكەلەۋگە ارناپ تەندەر وتكىزۋى نە ءۇشىن قاجەت بولىپ وتىرعانىن سۇراپ ءتيىستى مەكەمەگە حات تا جولدانعان ەدى.
سوعان جازىلعان جاۋاپ ەندى جەتتى.
رەسمي حاتتا كورسەتىلگەن مالىمەتكە سۇيەنسەك، ساراندىقتار وتكەن جىلدىڭ تاجىريبەسىنە سۇيەنىپتى-ءمىس. بىلتىرعى مەملەكەتتىك ساتىپ الۋدىڭ كەلىسىمشارتتارى بىرنەشە رەت بۇزىلدى ەكەن دەپ، بيىلعى جاڭا جىلدىق شىرشاعا التى اي بۇرىن تەندەر وتكىزىپ تاستاۋ قانشالىقتى اقىلعا سىيادى؟
كىشكەنە عانا قالانىڭ اكىمدىگى جاڭا جىل جاقىنداعاندا شىرشا ءۇشىن 30 ميلليون تەڭگەگە جۋىق قارجى بولسە، كوزگە ءتۇسىپ، سىننىڭ استىندا قالارى انىق. ساراندىقتار سول كوزگە تۇسۋدەن قورقىپ، التى اي بۇرىن شىرشانىڭ قامىن جاساۋعا كىرىسسە كەرەك. بىراق، ولار ول ايلادان دا تۇك شىقپاعانىن تۇسىنەر مە ەكەن؟
اسىل اباي
"ادىرنا" ۇلتتىق پورتالى
