قىرعىز رەسپۋبليكاسى ەكس-پرەزيدەنتكە مارتەبەسىن قايتارۋعا قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى 24.kg-عا سىلتەپ.
مينيسترلەر كابينەتى باسشىسىنىڭ ورىنباسارى ەدىل بايسالوۆ ەكس-پرەزيدەنت اسقار اقاەۆتىڭ زاڭ جۇزىندە ەكس-پرەزيدەنت مارتەبەسىن ساقتاپ وتىرعانىن ايتادى.
«زاڭ تۇرعىسىنان العاندا، اسقار اقايۇلىنىڭ قىرعىز رەسپۋبليكاسىنىڭ ەكس-پرەزيدەنتى اتاعىن ساقتاپ وتىرعانىنا ەش كۇمان جوق. ەگەر كىمدە-كىم ونى وسى مارتەبەدەن ايىرعىسى كەلسە، 2019 جىلى تەك ا.ش.اتامباەۆقا قاتىستى بولعان يمپيچمەنت پروتسەدۋراسى جۇرگىزىلۋى كەرەك»، - دەپ اتاپ ءوتتى. سونداي-اق، بايسالوۆ بۇل ونىڭ جەكە پىكىرى ەكەنىن ايتتى.
ۇكىمەت باسشىسى ورىنباسارىنىڭ ايتۋىنشا، «قازىرگى ۋاقىتتا قوعامدىق رەسۋرستاردى باياعى وقيعالار مەن جاعدايلار توڭىرەگىندە تالقىلاۋلار مەن داۋلارعا بۇرۋدىڭ قاجەتى جوق. كەرىسىنشە كۇش-جىگەردى بۇگىنگى كۇننىڭ مىندەتتەرىنە باعىتتاعان دۇرىس».
ەستەرىڭىزگە سالا كەتەيىك، بۇعان دەيىن ەكس-پرەزيدەنت اسقار اقاەۆ “ەكس-پرەزيدەنت مارتەبەسىن” قايتارۋدى سۇراعان بولاتىن. اقاەۆ قىرعىزستاندى تاۋەلسىزدىكتەن 2005 جىلى 24 ناۋرىزداعى رەۆوليۋتسيا ناتيجەسىندە وتستاۆكاعا كەتكەنگە دەيىن باسقاردى.
