مەملەكەت باسشىسى قاسىم-جومارت توقاەۆ 5 قىركۇيەك كۇنى «استانا» حالىقارالىق قارجى ورتالىعىن باسقارۋ جونىندەگى كەڭەس وتىرىسىن وتكىزدى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
جيىن باستالعانعا دەيىن قاسىم-جومارت توقاەۆ قارجى ورتالىعىنىڭ ەكوجۇيەسىن دامىتۋعا زور ۇلەس قوسقان قاتىسۋشىلار قىزمەتىمەن تانىستى.
Freedom Finance Global, China Construction Bank Corporation استانا فيليالى، Fix Price Group, Grata International جانە Binance Kazakhstan Technologies كومپانيالارىنىڭ باسشىلارى ءوز قىزمەتتەرىنىڭ ناتيجەلەرىن بايانداپ، ينۆەستيتسيالىق جوبالار، دامۋ جوسپارلارى تۋرالى مالىمەت بەردى.
مەملەكەت باسشىسى وتىمدىلىك قور نارىعىن دامىتۋدىڭ نەگىزگى كورسەتكىشىنىڭ ءبىرى ەكەنىن اتاپ ءوتتى
“ونى، ەڭ الدىمەن، ينستيتۋتسيونالدىق ينۆەستورلار قامتاماسىز ەتەدى. قازىر ازاماتتاردىڭ زەينەتاقى جيناعىنىڭ 50 پايىزىنا دەيىنگى بولىگىن جەكە ينۆەستيتسيالىق باسقارۋشىلارعا بەرۋ بويىنشا جۇمىس باستالدى. وسى ورايدا زەينەتاقى اكتيۆتەرى مەن احقو-داعى قارجى ينستيتۋتتارىنا شەتەلدىك ينۆەستيتسيالىق باسقارۋشى كومپانيالاردىڭ قول جەتكىزۋىنە مۇمكىندىك بەرۋ جايىن ويلاستىرۋ قاجەت”، دەدى پرەزيدەنت.
بۇل رەتتە مەملەكەت باسشىسى ۇلتتىق بانككە ۇكىمەتپەن، قارجى نارىعىن رەتتەۋ جانە دامىتۋ اگەنتتىگىمەن، احقو-مەن بىرگە كومپانيالاردى ورتالىقتا لوكاليزاتسيالاۋ بويىنشا تالاپتاردى كۇشەيتۋ مۇمكىندىكتەرىن قاراستىرۋدى ۇسىندى.
پرەزيدەنت شەتەل نارىعىندا ءبىر مەزگىلدە ورنالاستىرىلعان جاعدايدا جەرگىلىكتى قور نارىعىنداعى باعالى قاعازداردىڭ ۇلەسى مەن كولەمىنىڭ شەگىن بىرتىندەپ ۇلعايتۋدى باسىم مىندەتتىڭ ءبىرى رەتىندە اتادى. سونىمەن قاتار جەكە قازاقستاندىق كومپانيالاردى اشىق الاڭعا شىعارۋدى ىنتالاندىرۋدىڭ ماڭىزدىلىعىنا نازار اۋداردى. بۇل ولاردىڭ قىزمەتىنىڭ جاريالىلىعى مەن تيىمدىلىگىن راستايدى.
قاسىم-جومارت توقاەۆتىڭ ايتۋىنشا، كەلەسى باسىمدىق – بەكىتىلگەن «ويىن ەرەجەسىن» قاتاڭ ساقتاۋ
“كونستيتۋتسيالىق زاڭ كەپىلدىك بەرگەن احقو-داعى سالىق رەجيمى ورتالىقتى دامىتۋ ستراتەگياسىنىڭ ماڭىزدى بولىگى سانالادى. ول جاھان ينۆەستورلارى ءۇشىن قازاقستانننىڭ تارتىمدىلىعىن ارتتىرۋدا نەگىزگى ءرول اتقارادى. بۇل ءبىزدىڭ تۇراقتى ۇستانىمىمىز، ودان باس تارتپايمىز”، – دەدى مەملەكەت باسشىسى.
پرەزيدەنتتىڭ پىكىرىنشە، قازاقستاندا كومىرتەك نارىعىن دامىتۋ – مەملەكەتتىك ساياساتتىڭ باسىم باعىتتارىنىڭ ءبىرى. قازىر ەۋروپا وداعى ەلدەرى كومىرتەك مەحانيزمدەرىن شەكارادا رەتتەۋدى ەنگىزۋگە دايىندالىپ جاتىر. بۇل وتاندىق ونىمدەردى ەۋروپاعا ەكسپورتتاۋعا ەداۋىر كەدەرگى كەلتىرۋى مۇمكىن.
مەملەكەت باسشىسى توتەنشە جاعدايعا قارسى تۇرۋدىڭ ءتيىمدى قارجىلىق تەتىگىن قۇرۋ قاجەت ەكەنىنە توقتالدى. ءتۇرلى مەملەكەتتىك ساقتاندىرۋ قورلارى تابيعي اپاتتاردىڭ سالدارىمەن كۇرەسۋگە قولداۋ كورسەتۋى كەرەك. ۇكىمەت قارجى نارىعىن رەتتەۋ جانە دامىتۋ اگەنتتىگىمەن، «استانا» حالىقارالىق قارجى ورتالىعىمەن بىرلەسىپ، ورتالىق يۋريسديكتسياسىندا وسى ماقساتتاعى قور قۇرۋ ماسەلەسىن جان-جاقتى زەرتتەۋى كەرەك.
